نائب وزیراعظم اسحاق ڈار نے کہا کہ پاکستان کی معیشت ترقی کی راہ پر گامزن ہے اور جلد دنیا کی 24ویں مضبوط معیشت بن کر ابھرے گا۔ پاکستان سعودی عرب کو کان کنی کے شعبے میں سرمایہ کاری کی دعوت دیتا ہے۔
اسلام آباد میں پاکستان سعودی عرب بزنس فورم سے خطاب کرتے ہوئے نائب وزیراعظم نے کہا کہ پاکستان میں غیر ملکی سرمایہ کاری کے لیے سازگار ماحول موجود ہے اور اقتصادی بحالی ایجنڈے کے مثبت نتائج برآمد ہوں گے۔
مزید پڑھیں: پاکستان کے ساتھ 2 ارب ڈالر کے 27 معاہدے ہوں گے، سعودی وزیر سرمایہ کاری کا اعلان
اسحاق ڈار نے کہا کہ سعودی عرب سے اپنے قابل تکریم مہمانوں کو خوش آمدید کہتے ہیں، پاکستان آپکا دوسرا گھر نہیں بلکہ اپنا گھر ہے۔ ہم سعودی ولی عہد کی دعوت پر احرام میں ان کے ساتھ افطار پر شریک ہوئے، یہ ناقابل فراموش دن تھا۔
ان کا کہنا تھا کہ پاک سعودی عرب اسٹریٹجک شراکت داری نئے دور میں داخل ہوگئی ہے، پاکستان سعودی عرب کو کان کنی کے شعبے میں سرمایہ کاری کی دعوت دیتا ہے۔
’پاکستان 2018 میں جو جوہری طاقت تو تھا ہی مگر ایک عالمی معاشی طاقت بن کر ابھر رہ تھا مگر چند چیلنج آئے اور یہ سفر مشکلات کا شکار ہوگیا‘۔
یہ بھی پڑھیں: سعودی عرب کا اعلیٰ سطح کا وفد پاکستان پہنچ گیا، 2 ارب ڈالر کے سرمایہ کاری معاہدوں پر دستخط کا امکان
انہوں نے کہا کہ ہم سعودی عرب میں مقیم لاکھوں پاکستانیوں کی میزبانی کرنے پر بھی سعودی سلطنت کے شکرگزار ہیں، ہم سعودی لیڈر شپ کو ہماری ہرمشکل وقت میں مدد کرنے پر خراج تحسین پیش کرتے ہیں۔
