وزیراعظم محمد شہباز شریف سعودی عرب، پاکستان اور ترکیہ کے درمیان مکہ مکرمہ مشترکہ دفاعی معاہدے پر دستخط کے بعد مدینہ منورہ پہنچے، جہاں انہوں نے مسجد نبویؐ میں حاضری دی، جس کے بعد آج مدینہ منورہ سے روانہ ہوگئے۔
سعودی پریس ایجنسی کے مطابق وزیراعظم شہباز شریف کو مدینہ کے شہزادہ محمد بن عبدالعزیز بین الاقوامی ہوائی اڈے سے مدینہ کے گورنر شہزادہ سلمان بن سلطان بن عبدالعزیز، میئر فہد البلیحشی، سعودی عرب میں پاکستان کے سفیر احمد فاروق اور دیگر اعلیٰ حکام نے رخصت کیا۔
Prime Minister Muhammad Shehbaz Sharif visited Rauda e Rasool (SAW) in Masjid e Nabvi. Madinah, 8 August 2026. pic.twitter.com/tBbffs0271
— Prime Minister's Office (@PakPMO) August 8, 2026
وزیراعظم شہباز شریف کا مدینہ منورہ کا دورہ سعودی عرب، پاکستان اور ترکیہ کے درمیان ہونے والے تاریخی مکہ مکرمہ مشترکہ دفاعی معاہدے کے پس منظر میں ہوا۔ 7 اگست کو مکہ مکرمہ میں ہونے والے سربراہی اجلاس کے دوران سعودی ولی عہد و وزیراعظم شہزادہ محمد بن سلمان، ترک صدر رجب طیب اردوان اور وزیراعظم شہباز شریف نے معاہدے پر دستخط کیے تھے۔
معاہدے کے تحت تینوں ممالک میں سے کسی ایک پر مسلح حملہ تینوں ممالک پر حملہ تصور کیا جائے گا، جبکہ اجتماعی دفاع اور سلامتی کو مضبوط بنانے کے لیے دفاعی تعاون کے تمام شعبوں میں تعاون مزید بڑھانے پر اتفاق کیا گیا ہے۔
یہ بھی پڑھیں:سعودی عرب، پاکستان اور ترکیہ کے درمیان ’مکہ مکرمہ مشترکہ دفاعی معاہدہ‘ طے، کسی ایک پر حملہ تینوں پر حملہ تصور ہوگا
مکہ مکرمہ مشترکہ دفاعی معاہدہ سعودی عرب، پاکستان اور ترکیہ کے درمیان تاریخی برادرانہ تعلقات، اسلامی یکجہتی، مشترکہ تزویراتی مفادات اور طویل عرصے سے جاری دفاعی تعاون کو مزید مضبوط بنانے کی جانب اہم پیش رفت قرار دیا گیا ہے۔
