پنجاب کے نگران وزیر اطلاعات عامر میر نے پاکستان تحریک انصاف (پی ٹی آئی) کے رہنما فواد چوہدری کو گندی زبان کے استعمال سے گریز کرنے کا مشورہ دے دیا۔
نگران وزیر اطلاعات نے لاہور میں نیوز کانفرنس کرتے ہوئے کہا کہ فواد چوہدری کے بڑے منہ سے چھوٹی باتیں اچھی نہیں لگتیں۔
انہوں نے کہا کہ اس وقت پی ٹی آئی کی قیادت باؤلی ہو کر بہکی بہکی باتیں کر رہی ہے اگر زبان درازی بند نہ کی تو ہمیں دیسی علاج بھی کرنا آتا ہے۔
ان کا کہنا تھا کہ پنجاب کے نگران وزیراعلی محسن نقوی کے خلاف بد زبانی کر کے فواد چوہدری اپنے اندر کا گند باہر لا رہے ہیں۔
نگران وزیر کا کہنا تھا کہ سابق وزیر اعظم عمران نے جیسی تربیت فواد چوہدری کی ہے وہ ویسی ہی زبان بول رہے ہیں۔ کاش فواد چوہدری نے اپنے بزرگوں سے کچھ اچھی باتیں سیکھ لیتے۔
نیوز کانفرنس کے دوران انہیں نے کہا کہ فواد چوہدری ذاتیات پر نہ اتریں ورنہ جواب میں ان کے پلے کچھ نہیں بچے گا اور اگر انہوں نے زبان کو لگام نہ دی تو بھیانک ماضی بے نقاب ہونے میں دیر نہیں لگے گی۔
عامر میر کا مزید یہ کہنا تھا کہ پنجاب کی نگران حکومت پاکستان کے آئین کے تحت کام کر رہی ہے وہ فواد چوہدری یا عمران خان کو نہیں بلکہ الیکشن کمیشن کو جواب دہ ہیں۔
