آکسفورڈ یونیورسٹی کے چانسلر کے امیدواروں کی فہرست سے پاکستان تحریک انصاف (پی ٹی آئی) کے بانی چیئرمین عمران خان باہر ہوگئے۔ آکسفورڈ کی جانب سے چانسلر کے امیدواروں کی جاری کردہ لسٹ میں عمران خان کا نام موجود نہیں ہے۔ آکسفورڈ یونورسٹی نے عمران خان کے الیکشن کے کاغذات مسترد کرتے ہوئے 38امیدواروں کی لسٹ جاری کردی۔
گزشتہ روز آکسفورڈ یونیورسٹی کے چانسلر کے انتخاب میں سابق وزیر اعظم عمران خان کی شمولیت کے معاملے پر یونیورسٹی انتظامیہ نے قانونی رائے طلب کی تھی کہ وہ چانسلر بننے کے معیار پر پورا اترتے ہیں یا نہیں۔ برطانوی میڈیا کے مطابق آکسفورڈ یونیورسٹی کو اندازہ ہی نہیں تھا کہ یونیورسٹی چانسلر کے انتخاب کا سیدھا سادہ عمل اس قدر متنازع طور پر پیچیدہ ہو جائے گا۔
مزید پڑھیں: چانسلر کا انتخاب، عمران خان کے معاملے پر آکسفورڈ یونیورسٹی بھی مشکل میں پڑ گئی
رپورٹس کے مطابق لارڈ کرسٹوفر پیٹن کی بحیثیت چانسلر 2023-24 کے تعلیمی سال کے اختتام پر ریٹائرمنٹ کے اعلان کے بعد چانسلر کے انتخاب کی دوڑ شروع ہوئی، جس میں یونیورسٹی پہلی بار چانسلر کا انتخاب آن لائن مقبولیت کے ووٹ کے ذریعے کرائے گی۔
یونیورسٹی نے قانونی رائے طلب کی تھی کہ بانی پی ٹی آئی عمران خان چانسلر بننے کے معیار پر اترتے ہیں یا نہیں، آج انہوں نے اہل امیدواروں کا اعلان کردیا ہے۔ تاہم، انتخابی مراحل مکمل ہونے پر نئے چانسلر کا اعلان رواں برس کے آخر میں کیا جائے گا۔
مزید پڑھیں:عمران خان آکسفورڈ یونیورسٹی کے چانسلر کیوں نہیں بن سکتے؟
واضح رہے آکسفورڈ کی جانب سے سابق طلبہ کو چانسلر کے امیدواروں کی ترجیح کے اعتبار سے درجہ بندی کی دعوت دی گئی تھی، امیدواروں میں سابق برطانوی وزراء اعظم ٹونی بلیئر اور بورس جانسن سمیت لارڈ ولیم لیگ، لارڈ لیٹرمینڈلسن، لیڈی ویلش انجولینی، اور ڈاکٹر مارگریٹ بھی شامل ہیں۔
