پاکستان اگلے سال ہونے والی کرکٹ چیمپیئنز ٹرافی کی میزبانی کرے گا جس کے دوران بھارت کے 3 پول میچز اب صرف ایک مقام کی جگہ 2 مختلف مقامات پر رکھے جانے کی تجویز سامنے آئی ہے جس پر پاکستان کرکٹ بورڈ (پی سی بی) کو کوئی اعتراض نہیں۔
یہ بھی پڑھیں: چیمپیئنز ٹرافی میں بھارتی ٹیم کی شرکت، پاک-بھارت وزرائے خارجہ میں کیا گفتگو ہوئی؟
میڈیا رپورٹس کے مطابق آئی سی سی براڈکاسٹرز، جو ہندوستانی بورڈ کے براڈکاسٹر بھی ہیں، نے تجویز کیا ہے کہ 2 مقامات پر میچز رکھے جانے سے نشریات کے معیار اور ایونٹ کی قدر میں اضافہ ہوگا۔
پی سی بی کو 2 مقامات پر میچز کی میزبانی پر کوئی اعتراض نہیں ہے اور اس نے اس تجویز کی بنیاد پر راولپنڈی کو ایک جگہ کے طور پر تجویز کردیا ہے۔
مزید پڑھیے: چیمپیئنز ٹرافی 2025 کے پاکستان سے باہر انعقاد پر غور جاری ہے، وکرانت گپتا کا دعویٰ
غیر ملکی میڈیا کی رپورٹس کے مطابق پی سی بی نے ابتدائی طور پر صرف لاہور کو بھارت کے میچوں کے لیے تجویز کیا تھا لیکن براڈکاسٹرز نے اس کے لیے ایک اور مقام کو شامل کرنے کی تجویز دی۔
مزید پڑھیں: ’چیمپیئنز ٹرافی کا فائنل پاکستان سے باہر‘، پی سی بی نے برطانوی اخبار کے دعوے کی تردید کردی
میڈیا رپورٹس کے مطابق مجوزہ شیڈول میں لاہور میں بھارتی ٹیموں کے 3 میچز شامل ہیں جن میں 20 فروری کو بنگلہ دیش اور دوسرا 23 فروری کو نیوزی لینڈ کے خلاف میچ ہوگا۔ مزید برآں مجوزہ شیڈول کے مطابق پاکستان اور بھارت کے درمیان میچ لاہور میں یکم مارچ کو ہونا تھا۔ پاکستان، بھارت، نیوزی لینڈ اور بنگلہ دیش کو گروپ اے میں رکھنے کی تجویز دی گئی ہے۔
