افواج پاکستان کی خدمات اور قربانیوں کو خراج تحسین پیش کرنے کے لیے پنجاب اسمبلی میں قرارداد منظور کرلی گئی ہے۔
پیر کے روز پنجاب اسمبلی میں پارلیمانی امور کے وزیر مجتبیٰ شجاع الرحمان نے افواج پاکستان کو خراج تحسین پیش کرنے کے لیے قرارداد پیش کی۔
پنجاب اسمبلی میں پیش کی گئی قراردار کے متن میں کہا گیا ہے کہ یہ ایوان افواج پاکستان کے شہدا و غازیوں کو زبردست خراج تحسین پیش کرتا ہے۔ ’ افواج پاکستان بحریہ سرحدی حدود کے علاوہ نظریاتی سرحدوں کی بھی حفاظت کررہی ہیں، میدان جنگ میں فتح اور شکست کے فیصلے اسلحہ چلانے والوں کے حوصلے کرتے ہیں، تاریخ بزدلوں کو نہیں بہادروں کو یاد رکھتی ہے۔‘
یہ بھی پڑھیں: مسلح افواج دفاع وطن کے لیے ہر قربانی دینے کو تیار ہیں، وزیر دفاع خواجہ آصف
قراردار میں کہا گیا کہ قائد اعظم محمد علی جناح نے دفاع میں اسلحہ کی اہمیت نہیں بلکہ پاک افواج کے عزم و حوصلہ اور استقامت کی ضرورت پر زور دیا، پنجاب اسمبلی کا ایوان مسلح افواج کو وطن عزیز کے لیے دی جانے والی قربانیوں پر انہیں خراج عقیدت پیش کرتا ہے۔
قراردار میں مزید کہا گیا ہے کہ پاک فوج ہمیشہ مشکل وقت میں قوم کے شانہ بشانہ کھڑی ہوتی ہے اور قوم کی توقعات پر پورا اتری ہے، پاک افواج کے شاہینوں نے ہمیشہ قوم کا سر فخر سے بلند کیا ہے اور ہماری افواج جذبہ شہادت سے سرشار اور وطن کےلیے موت کو گلے لگانے کےلیے ہمہ وقت تیار رہتی ہے۔
یہ بھی پڑھیں: اسلام آباد کے گردو نواح میں آرمی ڈپلائمنٹ کا عمل مکمل، پاک فوج کے دستوں نے ڈی چوک کا کنٹرول سنبھال لیا
صوبائی اسمبلی میں منظور کی گئی قرارداد میں کہا گیا ہے کہ یہ ایوان پاک افواج کے مسلح شہیدوں غازیوں کو خراج عقیدت و تحسین پیش کرتا ہے، پاک افواج قوم کے ماتھے کا جھومر ہیں، پاکستان میں مضبوط مسلح افواج بری، بحری اور فضائی سرحدوں کی حفاظت کے ساتھ ملک کی نظریاتی سرحدوں کی بھی محافظ ہیں۔
قرارداد میں افواج پاکستان کی قربانیوں کو خراج عقیدت پیش کرتے ہوئے کہا گیا ہے کہ مسلح افواج اور اس کے ذیلی اداروں کی خدمات ناقابل فراموش ہیں، پاک فوج نے وفاقی و صوبائی حکومتوں کی معاونت کرتے ہوئے امن و امان کے قیام، حوالہ ہنڈی کے کاروبار، اسمگلنگ، دہشتگردی کے تدارک کے لیے بھرپور معاونت کی، جو قابل تحسین ہے۔
یہ بھی پڑھیں: پاک فوج نے نمایاں کارکردگی پر 35 سائنسدانوں اور انجینیئرز کو اعزازات سے نواز دیا
مجتبیٰ شجاع الرحمن کی پیش کردہ قرارداد میں کہا گیا ہے کہ پاک افواج نے دہشت گردی کے خلاف جنگ جیت کر قوم کے دل جیت لیے ہیں کیوں کہ پاک افواج کی قربانیوں کی بدولت قوم رات کو سکون سے سوتی ہے، اس لیے یہ ایوان تمام مسلح افواج کو زبردست خراج تحسین پیش کرتا ہے۔
صوبائی اسمبلی میں پاک فوج کو خراج تحسین پیش کرنے کی قراردار کثرت رائے سے منظور کرلی گئی۔
