انٹرنیشنل کرکٹ کونسل (آئی سی سی) نے مایہ ناز پاکستانی اسپنر نعمان علی کو ماہ اکتوبر کے لیے پلیئر آف دی منتھ منتخب کرلیا ہے۔
گزشتہ ہفتے آئی سی سی نے اکتوبر کے لیے پلیئر آف دی منتھ کی مردوں کی کیٹیگری میں جن کھلاڑیوں کو نامزد کیا تھا ان میں پاکستانی اسپنر نعمان علی، جنوبی افریقہ کے فاسٹ بولر کاگیسو ربادا اور نیوزی لینڈ کے مچل سینٹنر شامل تھے۔ نعمان علی نے انگلینڈ کے خلاف ٹیسٹ سیریز میں بہترین کارکردگی کا مظاہرہ کیا تھا اور آخری 2 ٹیسٹ میچز میں 20 وکٹیں حاصل کی تھیں، جس کی بنا پر انہیں آئی سی سی پلیئر آف دی منتھ منتخب کیا گیا ہے۔
آئی سی سی کی جانب سے خواتین کھلاڑیوں کی کیٹیگری میں ویسٹ انڈیز کی آل راؤنڈر ڈی اینڈرا، نیوزی لینڈ کی امیلیا کیر اور جنوبی افریقہ کی لارا وولوارٹ شامل تھیں۔ آئی سی سی کی جانب سے نیوزی لینڈ کی امیلیا کیر کو خواتین کیٹیگری میں اائی سی سی لیئر آف دی منتھ منتخب کیا گیا ہے۔ امیلیا کو ٹی20 ورلڈ کپ میں 135 رنز بنانے اور 15 وکٹیں لینے پر پلیئر آف دی ٹورنامنٹ کا ایوارڈ دیا گیا تھا۔
انگلینڈ کیخلاف 11 وکٹیں لینے والے لیفٹ آرم اسپنر نعمان علی کون ہیں؟
سندھ کے علاقے سانگھڑ سے تعلق رکھنے والے 38سالہ لیفٹ آرم اسپنر نعمان علی نے ملتان میں کھیلے گئے دوسرے ٹیسٹ میچ میں مجموعی طور پر 11وکٹیں حاصل کیں۔ انہوں نے پہلی اننگز میں 3 جبکہ دوسری اننگز میں 8وکٹیں حاصل کیں۔
یہ بھی پڑھیں: اکتوبر کے لیے آئی سی سی کا بہترین کرکٹرز کی نامزدگیوں کا اعلان، نعمان علی بھی شامل
38سالہ نعمان علی کا تعلق سندھ کے علاقے سانگھڑ سے ہے، باقی نوعمر کھلاڑیوں کی طرح انہوں نے بھی کرکٹ کا آغاز ٹیپ بال کرکٹ سے کیا۔ 13سال کی عمر میں ان کے والد کی ملازمت کے سلسلے میں فیملی حیدرآباد منتقل ہوگئی جہاں انہوں نے فضل الرحمٰن کرکٹ کلب کو جوائن کیا۔
کلب کرکٹ سے شروع ہونے والا سلسلہ پھر کہیں نا رکا اور پھر مختلف ٹیموں کی طرف سے کرکٹ کیریئر کا آغاز کیا، فرسٹ کلاس کرکٹ میں حیدر آباد کی طرف سے کھیلنا شروع کیا اور پھر کارکردگی کے باعث پی ایس ایل اور قومی ٹیم تک پہنچ گئے۔
مزید پڑھیں: انگلینڈ کے خلاف 7 وکٹیں لینے والے ساجد خان کون ہیں؟
نعمان علی پی ایس ایل میں ملتان سلطان کی نمائندگی کرچکے ہیں، انہوں نے 26جنوری 2021 میں جنوبی افریقہ کے خلاف ٹیسٹ میچ میں ڈیبیو کیا۔ نعمان علی 16ٹیسٹ میچ کھیل چکے ہیں اور اب تک 58وکٹیں حاصل کی ہیں۔
نعمان علی کو کرکٹ کا شوق اپنے ماموں رضوان احمد کو دیکھ کر ہوا جنہوں نے ایک ون ڈے انٹرنیشنل میں پاکستان کی نمائندگی کی ہے۔ نعمان علی ٹیپ بال میں تیز بولنگ کیا کرتے تھے لیکن ماموں کے کہنے پر اسپن بولنگ شروع کی۔
یہ بھی پڑھیں: 3 سال بعد گھر میں پہلی ٹیسٹ فتح، پاکستان نے انگلینڈ کو دوسرے ٹیسٹ میں 152 رنز سے ہرا دیا
نعمان علی فرسٹ کلاس کرکٹ میں حیدر آباد کے آرایل اور ناردن کی ٹیموں کی نمائندگی کرچکے ہیں جبکہ یو بی ایل کی طرف سے گریڈ ٹو کرکٹ کھیلے ہیں۔
نعمان علی نے اس کے علاوہ 24جولائی 2023 میں کولمبو میں کھیلے گئے ٹیسٹ میچ کی دوسری اننگز میں سری لنکا کے خلاف 7وکٹیں حاصل کی تھیں، اس کے علاوہ زمبابوے کے خلاف بھی ایک اننگز میں 5وکٹیں حاصل کرچکے ہیں۔ تاہم، انہوں نے جنوبی افریقہ کے خلاف اپنے ڈیبومیچ میں 7 وکٹیں حاصل کی تھیں۔
