کراچی میں جاری دفاعی نمائش آئیڈیاز 2024 میں پاکستان نے پہلی مرتبہ اپنا تیار کردہ لانگ رینج ائیر سرویلنس ریڈار سسٹم نمائش کے لیے پیش کردیا ہے۔
میڈیا رپورٹس کے مطابق، 450 کلو میٹر تک فضائی نگرانی کرنے والا پاکستانی ساختہ اے ایم 350 ایس ریڈار سسٹم موبائل پلیٹ فارم پر نصب ہے جسے تیزی کے ساتھ کہیں بھی منتقل کیا جاسکتا ہے۔
یہ بھی پڑھیں: دفاعی نمائش آئیڈیاز 2024 کی سافٹ لانچنگ، غیر ملکی سفارتکار کیا کہتے ہیں؟
اس حوالے سے ڈائریکٹر بلیو سرچ پرائیویٹ لمیٹڈ اویس رؤف نے میڈیا سے بات کرتے ہوئے بتایا پاکستان اپنی اس ضرورت کے تحت دیگر ملکوں سے ریڈار سسٹم درآمد کرکے انہیں استعمال کرتا رہا ہے، پاکستان کو عالمی پابندیوں کا سامنا رہا، تاہم اب پاکستان نے بھی اپنا لانگ رینج ائیر سرویلنس ریڈار سسٹم بنا لیا ہے۔
اویس رؤف کا کہنا تھا کہ ڈرونز اور انتہائی تیز رفتار میزائل سسٹمز نے دور حاضر میں جنگوں کے طریقہ کار کو بدل کر رکھ دیا ہے، روس اور یوکرین کی جنگ ہو یا دنیا میں جاری کوئی اور تنازعہ، فوجی نقل و حمل کی نگرانی سے لے کر دشمن کے جنگی اہداف پر تباہ کن حملوں تک ہر طرح کی صورتحال میں میزائل سسٹمز اور ڈرونز کلیدی کردار ادا کر رہے ہیں۔
یہ بھی پڑھیں: آرمی چیف کا کراچی میں عالمی دفاعی نمائش آئیڈیاز 2024 کا دورہ، غیرملکی فوجی حکام سے تبادلہ خیال
پاکستان کے دوست ممالک نے بھی اس جدید ترین ریڈار سسٹم میں دلچسپی کا اظہار کیا ہے۔ ماہرین کو امید ہے کہ بہت جلد پاکستان خود اپنا ایک مکمل ائیر ڈیفنس سسٹم بنانے میں کامیاب ہو جائے گا۔
