پاکستان تحریک انصاف (پی ٹی آئی) کے پُرتشدد احتجاجی مظاہرین کی ایکسپریس وے اسلام آباد پر آنسو گیس فائرنگ کی سی سی ٹی وی فوٹیج منظر عام پر آگئی۔
سی سی ٹی وی فوٹیج کے مطابق پی ٹی آئی تربیت یافتہ احتجاجی مظاہرین کی جانب سے آنسو گیس کے شیل فائر کیے جارہے ہیں۔
یہ بھی پڑھیں بشریٰ بی بی سارے فساد کی جڑ، پی ٹی آئی کے ساتھ کوئی مذاکرات نہیں ہوں گے، حکومت کا اعلان
سیکیورٹی ذرائع کے مطابق پی ٹی آئی کے احتجاجی مظاہرین کے پاس سرکاری اور جدید اسلحہ کی فراہمی پریشان کن ہے، اس سے قبل بھی کارکنان کی پُرتشدد واقعات میں متعدد ویڈیوز منظر عام پر آچکی ہیں۔
سی سی ٹی وی فوٹیج میں واضح ہے کہ یہ کوئی عام لوگ نہیں بلکہ تربیت یافتہ لوگ ہیں جو بڑی مہارت سے جدید اسلحہ اور آنسو گیس کے شیل فائر کررہے ہیں۔
سیکیورٹی ذرائع نے کہاکہ ان مسلح جتھوں کو پُرتشدد حملوں کے لیے لایا گیا ہے، عام آدمی اتنی مہارت سے یہ جدید اسلحہ اور شیل فائر نہیں کرسکتا۔
سیکیورٹی ذرائع کے مطابق اس کا مطلب واضح ہے کہ یہ جتھے ایک منظم حکمت عملی کے تحت لائے گئے ہیں، جن کا مقصد اپنے سیکیورٹی اداروں پر حملہ آور ہوکر لا اینڈ آرڈر کی صورت حال میں بگاڑ پیدا کرنا ہے۔
سیکیورٹی ذرائع کے مطابق سب سے پریشان کن بات یہ ہے کہ یہ اسلحہ تو صرف سرکاری طور پر استعمال ہوتا ہے جو قانون نافذ کرنے والے اداروں کے استعمال میں ہوتا ہے، ایک عام آدمی کے ہاتھ میں اس اسلحہ کی فراہمی کس نے کی؟ یہاں بہت سے سوالات جنم لیتے ہیں۔
سیکیورٹی ذرائع نے کہاکہ کیا خیبرپختونخوا کی حکومت اپنے سرکاری وسائل کا استعمال ان پرتشدد کارروائیوں کے ذریعے وفاق پر حملہ آور ہونے کے لیے استعمال کررہی ہے؟ یہ سرکاری اور جدید اسلحہ اپنے ہی قانون نافذ کرنے والے اداروں کے خلاف استعمال کرنا انتہائی پریشان کن ہے۔
ذرائع نے کہاکہ قانون نافذ کرنے والے اداروں پر کل سے کئی بار پرتشدد حملے کیے جا چکے ہیں، ان حملوں میں رینجرز کے جوانوں کی شہادتیں ہوئیں اور پولیس کے جوان شہید اور زخمی بھی ہوئے، جبکہ سرکاری املاک کو نقصان بھی پہنچایا گیا۔
سیکیورٹی ذرائع نے سوال کیاکہ یہ سرکاری اسلحہ کس کی ایما پر لایا گیا؟ کس نے سہولت کاری کی اور یہ تمام تر اسلحہ یہاں لا کر ریاست کے خلاف شر انگیزی کس کے کہنے پر کی جا رہی ہے؟
یہ بھی پڑھیں پی ٹی آئی کا مارچ ڈی چوک پہنچتے ہی بیرسٹر گوہر کا عمران خان کی رہائی سے متعلق بڑا اعلان
سیکیورٹی ذرائع نے کہاکہ ریاست ان عناصر کی نشاندہی کررہی ہے اور شر پسند عناصر کو قانون کے مطابق قرار واقعی سزا دی جائے گی۔
