وزیراعلیٰ پنجاب مریم نوازشریف کی ہدایت پر پاکستان کی تاریخ میں پہلی مرتبہ ذیابیطس/ شوگر کے پیدائشی مریض بچوں کے لیے مفت انسولین کی فراہمی کے پراجیکٹ میں ٹائپ ون ڈایابیٹک بچوں کو انسولین ان کے گھر پر ہی پہنچائی جائے گی۔
چیف منسٹر مریم نواز پروگرام کے تحت ٹائپ ون ڈایابیٹک بچوں کے رجسٹریشن کا آغاز ہوچکا ہے اور بچوں کو گھر بیٹھے ہی پروگرام میں رجسٹریشن کی سہولت میسر آئے گی۔ مفت انسولین کے لیے تحصیل یا ضلع میں این سی ڈی کلینک پر رابطہ کیا جاسکتا ہے، چیف منسٹر مریم نواز انسولین کے لیے خصوصی ہیلپ 1033 بھی قائم کی گئی ہے۔
مزید پڑھیں: پاکستان میں 4 کروڑ افراد ذیابیطس کا شکار، مگر لاعلم
وزیراعلیٰ مریم نوازشریف نے کہا کہ ننھے بچے پھول کی مانند ہوتے ہیں اور ہم انہیں مرجھانے نہیں دیں گے۔ ماں ہوں بچوں کی تکلیف اور بیماری کا شدت سے احساس ہے۔ انہوں نے کہا کہ ٹاپ ون ڈایابیٹک بچوں کو اسپتال آنے جانے کی کوفت سے بچانے کے لیے گھر بیٹھے انسولین دی جائے گی۔
ان کا کہنا تھا کہ ٹائپ ون ڈایابیٹک بچوں کو تاحیات انسولین کی ضرورت ہوتی ہے، ان کے والدین کا بوجھ بٹائیں گے۔ وزیر اعلیٰ مریم نوازشریف نے کہا کہ پنجاب بھر میں بچوں کی صحت اور علاج کے لیے تمام تر میسر وسائل مہیا کریں گے۔
