گھر سے مسجد تک جانے کا بھی اللہ تعالیٰ نے ثواب رکھا ہے لیکن سوچیں کوئی عبادت کی غرض سے اپنے گھر سے مکہ مکرمہ تک پیدل چلا جائے تو اس عمل کے اجر کا عالم کیا ہوگا؟ اوکاڑہ کے ایک رہائشی نے اس اجر عظیم کے حصول کے لیے یہ کارنامہ سر انجام دے دیا ہے۔
حج کے لیے پیدل سفر کرنے والے عثمان ارشد تقریباً ساڑھے 5 ہزار کلومیٹر کا فاصلہ پیدل طے کر کے بالآخر خانہ خدا پہنچ گئے۔
عثمان ارشد نےحج کے لیے اپنے آبائی علاقے اوکاڑہ سے گزشتہ سال یکم اکتوبر کو پیدل سفر کا آغاز کیا تھا اور انہوں نے 6 ماہ 13 روز بعد اپنی مبارک منزل پر پڑاؤ ڈال دیا۔
جمعے کو اپنی ٹوئٹ میں عثمان ارشد نے بتایا کہ انہوں نے مکہ پہنچ کر عمرے کی سعادت حاصل کرلی ہے۔ انہوں نے اس موقع پر ایک تصویر بھی شیئر کی۔
اس ٹوئٹ سے قبل ایک اور ٹوئٹر پیغام میں انہوں نے اطلاع دی کہ وہ 6 ماہ اور 13 دن میں 5400 کلو میٹر کا سفر پیدل طے کرنے کے بعد مکہ پہنچ چکے ہیں۔
الحمدللہ عمرہ ادا کرنے کے بعد آپ سب کیلئے خانہ کعبہ کے سامنے ڈھیروں دعائیں ❤️
اوکاڑہ پاکستان سے مکہ حج 2023 کیلئے پیدل سفر pic.twitter.com/DlTFv0XLzi
— Usman Arshad (@usmanarshad63) April 14, 2023
عثمان ارشد اپنے سفر کے دوران ایک ماہ میں کوئٹہ پہنچے تھے جس کے بعد وہ ایران میں داخل ہوئے تاہم وہاں انہیں پیدل سفر کے لیے ویزے کی مشکل درپیش ہوئی جس کے سبب وہ ایران سے بحری راستے دبئی پہنچے تھے۔
یاد رہے کہ پیدل سفر کر کے مکہ پہنچنے سے قبل عثمان اوکاڑہ سے پاک چین بارڈر خنجراب تک کا پیدل سفر بھی کر چکے ہیں۔
