وفاقی وزیر داخلہ محسن نقوی نے کہا ہے کہ تعمیراتی عمل ریکارڈ مدت میں مکمل ہونے پر ایف 8 انڈر پاس منگل 24 دسمبر کو ٹریفک آمدورفت کے لیے کھول دیا جائے گا۔
سرینا چوک انٹرچینج کا جنوری میں افتتاح ہو گا جو صرف 60 دن میں مکمل ہوگا۔ وہ ایف 8 ایکسچینج چوک انٹرچینج اور سرینا چوک انٹرچینج پراجیکٹس کے دورہ کے موقع پر گفتگو کررہے تھے۔
یہ بھی پڑھیں: اسلام آباد میں 2 اہم پراجیکٹس کی تعمیر، اب شہری کن راستوں پر سفر کیا کریں گے؟
وزیر داخلہ محسن نقوی نے منصوبوں کے انڈر پاسز اور فلائی اوورز کی تعمیر کے کاموں کا مشاہدہ کیا۔ چئیرمین سی ڈی اے محمد علی رندھاوا اور کنٹریکٹرز نے پراجیکٹس پر پیشرفت بارے بریفنگ دیتے ہوئے بتایا کہ منصوبوں کے فلائی اوورز اور انڈر پاس پر بیک وقت کام جاری ہے۔
وزیر داخلہ نے کہا کہ ایف 8 میں تعمیر ہونے والا انڈرپاس 24 دسمبر کو ٹریفک کے لیے کھول دیا جائے گا۔ انہوں نے کہا کہ ایف 8 ایکسچینج چوک انٹرچینج کا انڈر پاس صرف 42 روز میں مکمل کرنے کے لیے دن رات کام جاری ہے۔
وزیر داخلہ نے ہدایت کی کہ منصوبوں کی تکمیل میں کسی بھی قسم کی رکاوٹ کو بروقت دور کیا جائے اور مقررہ مدت میں دونوں منصوبوں کی تکمیل کو ہر صورت یقینی بنایا جائے۔
مزید پڑھیے: مونال کی بندش کے بعد، مارگلہ ہلز پر کون سا نیا منصوبہ شروع کیا جارہا ہے؟
انہوں نے کہا کہ منصوبوں کو ریکارڈ مدت میں مکمل کرنا ہے تاکہ اسلام آباد کے شہریوں کو جلد سے جلد ٹریفک کے مسائل سے چھٹکارا مل سکے۔
وزیر داخلہ نے ہدایت دی کہ منصوبوں کی تعمیر کے دوران درختوں کی ہر ممکن حفاظت یقینی بنایا جائے،دونوں منصوبوں کے مختلف سیکشنز پر ہمہ وقت کام جاری رکھا جائے۔ سیکریٹری داخلہ خرم علی آغا بھی اس موقعے پر موجود تھے۔
