’میں حلف اٹھاتا ہوں کہ میں ایمانداری کے ساتھ امریکی صدر کے عہدے پر عمل کروں گا اور اپنی بہترین صلاحیت کے مطابق امریکی آئین کی حفاظت اور دفاع کروں گا۔‘ یہ الفاظ کہنے کے بعد ڈونلڈ ٹرمپ باضابطہ طور پر امریکا کے 47ویں صدر بن جائیں گے۔
مزید پڑھیں: بائیڈن کے تمام ایگزیکٹو آرڈرز کو منسوخ کیا جائے گا، ڈونلڈ ٹرمپ کا حلف سے قبل خطاب
سوموار 20 جنوری کو ٹرمپ کی دوسری حلف برداری کے دن کا آغاز واشنگٹن ڈی سی میں لافائیٹ سکوائر کے تاریخی سینٹ جان چرچ میں ایک دعائیہ تقریب سے ہوگا جس کے بعد وائٹ ہاؤس میں چائے کا اہتمام کیا جائے گا۔ امریکی کیپیٹل کے ویسٹ لان میں واقع مرکزی تقریب کے اسٹیج پر موسیقی کی پرفارمنس اور افتتاحی کلمات 9:30 پر شروع ہوں گے۔
مزید پڑھیں: ڈونلڈ ٹرمپ کی تقریب حلف برداری میں کن عالمی رہنماؤں کو مدعو کیا گیا اور کن کو نہیں؟
اس کے بعد ٹرمپ اور نائب صدر وینس کی حلف برداری ہوگی۔ جہاں نو منتخب صدر ڈونلڈ ٹرمپ 2 بائبلوں پر ہاتھ رکھ کر حلف اٹھائیں گے۔ ٹرمپ کی افتتاحی کمیٹی کی جانب سے جاری پریس ریلیز میں کہا گیا ہے کہ ٹرمپ اپنی بائبل استعمال کریں گے جو انہیں 1955 میں ان کی والدہ نے دی تھی۔ دوسری بائبل، لنکن بائبل ہے جو پہلی بار 1861 میں 16ویں امریکی صدر نے حلف اٹھانے کے لیے استعمال کی تھی۔
