امریکا میں کسی چین مخالف تقریب میں شرکت نہیں کی، مخالفین پروپیگنڈا کررہے ہیں، محسن نقوی

وفاقی وزیرداخلہ محسن نقوی نے اپنے دورہ امریکا سے متعلق وضاحت کرتے ہوئے کہا ہے کہ انہوں نے وہاں چین کے خلاف کسی تقریب میں شرکت نہیں کی، اس حوالے سے مخالفین پروپیگنڈا کررہے ہیں۔

ہیوسٹن میں میڈیا سے گفتگو کرتے ہوئے وزیر داخلہ محسن نقوی نے کہا کہ انہوں نے نوجوانوں کی تقریب میں شرکت کی تھی جس پر پروپیگنڈا کیا گیا اور اسے غلط رنگ دیا گیا۔ انہوں نے کہا کہ ایسے پروپیگنڈے سے فرق نہیں پڑتا۔

یہ بھی پڑھیں: محسن نقوی کی امریکی کمپنیوں کو ملک میں سرمایہ کاری کی دعوت

محسن نقوی نے کہا ہے کہ امریکی ایوان نمائندگان کو پاکستان کے خلاف اکسایا جارہا ہے، سیاست کریں لیکن اس حد تک نہ جائیں کہ پاکستان کا نقصان ہو۔ انہوں نے بتایا کہ دورہ امریکا کے دوران کانگریس اراکین کے ساتھ ملاقاتیں بہت مثبت رہیں۔

ان کا کہنا تھا کہ دہشتگردی صرف پاکستان کی نہیں سب کی مشترکہ لڑائی ہے، امریکی سیاستدانوں سے مل کر دہشتگردی کے خلاف منصوبہ بنائیں گے اور پاکستان کے خلاف ہتھیار اٹھانے والوں سے آہنی ہاتھوں سے نمٹیں گے۔

یہ بھی پڑھیں: محسن نقوی کے دورہ امریکا میں وزارت خارجہ کا کوئی کردار نہیں، ترجمان دفتر خارجہ

واضح رہے کہ ہفتے کو وزیر داخلہ محسن نقوی نے امریکا میں یو ایس چیمبر آف کامرس کا دورہ کیا تھا اور امریکن پاکستان بزنس کونسل کے ایک اعلیٰ سطح کے وفد سے ملاقات کی تھی، جس میں انہوں نے امریکی کمپنیوں کو پاکستان میں سرمایہ کاری کی دعوت دی تھی۔