پاکستانی نوجوان سے شادی کرنے کی غرض سے کراچی پہنچ جانے والی امریکی خاتون ان دنوں جناح اسپتال کے اسپیشل وارڈ میں رکھا گیا گیا ہے جہاں انہیں درکار طبی سہولیات کی فراہمی کے علاوہ ان کی سیکیورٹی کے بھی سخت انتظامات کیے گئے ہیں۔
یہ بھی پڑھیں: ’امریکی خاتون آنے کے بعد چھیپا صاحب کی انگریزی بہتر ہوگئی‘، ڈونلڈ ٹرمپ کو مبارکباد کی ویڈیو وائرل
ذرائع کے مطابق امریکی خاتون اونیجا اینڈریو رابنس کو امریکی قونصل خانے نے وطن واپسی کے لیے آمادہ کر لیا ہے اور امریکی قونصل خانے کی طرف سے خاتون کی ریٹرن ٹکٹ کا انتظام کیا جا رہا ہے تا کہ وہ اپنے ویزے کی مدت ختم ہونے سے پہلے امریکا روانہ ہو سکیں۔
جناح اسپتال کے ترجمان جہانگیر درانی کے مطابق جناح اسپتال کے میڈیکل بورڈ کے سربراہ پروفیسر چنی لال نے امریکی قونصل خانے کے عملے کو ایک گھنٹے تک مریضہ سے متعلق بریفنگ دی ہے۔
مزید پڑھیے: پاکستانی نوجوان کی محبت میں مبتلا امریکی خاتون اچانک کہاں غائب ہو گئی؟
ترجمان کا کہنا ہے کہ ڈاکٹر نے امریکی قونصلیٹ کے عملے کو بتایا کہ مریضہ کی طبیعت پہلے سے اب کافی بہتر ہے جس وقت انہیں اسپتال لایا گیا تھا اس وقت ان کا ہیموگلوبن صرف 4 تھا تاہم خون کے 3 پیک لگانے کے بعد ہیمو گلوبن 9 ہوگیا ہے جب کہ نفسیاتی مرض بائی پولر ڈس آرڈر کو کنٹرول کرنے کے حوالے سے ان کی حرکات اور سکنات کو مسلسل مانیٹر کیا جا رہا ہے اور ادویات بھی دی جارہی ہیں۔
اسپتال کے ترجمان کے مطابق امریکی قونصلیٹ کے عملے کو مریضہ کو اب تک دی جانے والی ادویات اور ٹیسٹوں کے حوالے سے تفصیلی بریفنگ دی گئی۔
ترجمان نے کہا کہ مریضہ کے دیگر طبی مسائل پر بھی کسی حد تک بہتری آئی ہے اور انہیں میڈیکل بورڈ کی فٹنس کے بعد 11 فروری سے پہلے اسپتال سے ڈسچارج کردیا جائے گا کیوں کہ ان کا 15 دن کا ایگزٹ پرمٹ 11 فروری کو ختم ہو جائے گا۔
ایف آئی اے حکام کے مطابق امریکی خاتون ایگزٹ پرمٹ ایکسپائری تک واپس نہیں گئیں تو 11 فروری کے بعد انہیں پاکستان میں زائد المیعاد قیام کی کارروائی کا سامنا کرنا پڑے گا جس کے تحت خاتون کوفارن ایکٹ کے تحت مقدمہ کا سامنا کرنا ہوگا اور انہیں گرفتار کرکے عدالتی کارروائی کا سامنا کرنا ہوگا جس کے بعد انہیں ڈی پورٹ کیا جائے گا۔
مزید پڑھیں: پاکستان نوجوان کی محبت میں گرفتار امریکی خاتون وطن واپس جانے پر رضامند
امریکی خاتون 11 اکتوبر 2024 کو کراچی پہنچی تھیں۔ وہ اپنے آن لائن بننے والے دوست سے ملنے پاکستان آئی تھیں جو اب منظر سے غائب ہے۔ کراچی آنے کے بعد سے خاتون شہر میں ادھر ادھر گھوم رہی تھیں جس سے اس کی زندگی کو خطرہ لاحق تھا تاہم اب انہیں جناح اسپتال میں رکھا گیا ہے۔
خاتون کو صحت کے دیگر مسائل کے علاوہ بظاہر نفسیاتی مسائل بھی درپیش ہیں۔
