ساؤتھ ویسٹ ایئر لائنز نے تکنیکی خرابی کے باعث اپنی تمام پروازیں عارضی طور پر گراؤنڈ کردیں جس کے سبب امریکا میں ہزاروں پروازیں تاخیر کا شکار ہو گئیں۔
بی بی سی کے مطابق ایئر لائن کا کہنا ہے کہ وہ ملک بھر میں ایک گھنٹے کے اسٹاپ سے متاثر ہونے والے مسافروں کو ایڈجسٹ کرنے کے لیے کام کرے گی۔
امریکی ملٹی نیشنل ٹیکنالوجی کمپنی فلائٹ اویئر کا کہنا ہے کہ منگل کو 5,400 سے زائد پروازیں تاخیر کا شکار جبکہ 100 سے زائد منسوخ ہوئیں۔
کمپنی کا کہنا تھا کہ آج صبح ساؤتھ ویسٹ ایئر لائنز کو اپنے اندرونی نظام میں سے ایک میں تکنیکی مسئلہ کا سامنا کرنا پڑا جس کے بعد ایئر لائن کی درخواست پر تمام روانگیوں کو روک دیا گیا تھا تاہم ان کی سروس دوبارہ شروع ہو گئی ہے۔
سوشل میڈیا پر ایئر لائن کے نمائندوں نے مسافروں سے کہا کہ وہ انہیں براہ راست مدد کے لیے میسج کریں اور مسافروں کو یقین دلانے کی کوشش کی کہ کمپنی اس مسئلے کو حل کرنے کے لیے کام کر رہی ہے۔
کرسمس کی چھٹیوں کے دوران بھی عملے کی کمی کے باعث ساؤتھ ویسٹ ایئر لائنز کو مشکلات کا سامنا رہا تھا جس کی وجہ سے 16,700 پروازیں منسوخ ہوئیں اور 20 لاکھ صارفین کے سفر میں خلل پڑا۔
