طلاق کے بعد اداکار فیروز خان کی سابق اہلیہ علیزہ سلطان نے ماڈلنگ اور ڈیلی وی لاگنگ شروع کر دی تھی۔ وہ مختلف مواقع پر اپنے بچوں سلطان اور فاطمہ کے ساتھ تصاویر اور ویڈیوز بھی شیئر کرتی رہتی تھیں۔ تاہم، کچھ وقت بعد انہوں نے ڈیلی وی لاگ بنانا بند کر دیا۔
ڈیلی وی لاگنگ بند کرنے کے حوالے سے بات کرتے ہوئے علیزہ سلطان کا کہنا تھا کہ وہ انٹرنیٹ پر اپنی زندگی کے حوالے سے بہت زیادہ پوسٹ نہیں کرتیں۔ انہوں نے کہا جو وی لاگ وہ کر رہی تھیں اس سے ان کی زندگی بے نقاب ہو رہی تھی۔ اور وہ زندگی کے بارے میں زیادہ باتیں بتا رہی تھیں کہ ان کی زندگی میں کیا ہو رہا ہے اس لیے انہیں وہ اچھا نہیں لگ رہا تھا۔
علیزہ سلطان کا کہنا تھا کہ ان کا پسندیدہ وی لاگر رجب بٹ ہے، لیکن وہ انہیں کبھی کبھی دیکھتی ہیں۔ انہوں نے بتایا کہ ان کی خالہ رجب بٹ کی بہت بڑی فین ہیں اور انہوں نے خالہ کی وجہ سے ہی وی لاگ دیکھنا شروع کیا تھا۔
سنگل پیرنٹ کے حوالے سے بات کرتے ہوئے ان کا کہنا تھا کہ یہ بہت مشکل ہے کیونکہ آپ کو ماں اور بطاپ دونوں کی ذمہ داریاں نبھانی ہوتی ہیں اور یہ بولنا کہ میں صرف اتنا کر سکتا تھا وہ آپشن نہیں ہوتا۔ لیکن جب بچے بڑے ہو جاتے ہیں تو صبر کا پھل مل جاتا ہے۔
یہ بھی پڑھیں: ’زینب میرے دل کی ڈاکٹر تھیں اور اب میرے بلوں کی ڈاکٹر ہیں‘، اداکار فیروز خان کی اہلیہ کے ساتھ ویڈیو وائرل
واضح رہے کہ علیزہ سلطان نے 2018 میں اداکار فیروز خان سے شادی کی تھی اور انہیں دو بچے ہیں۔
دونوں کے درمیان 2021 میں اختلافات پیدا ہوئے تھے اور ستمبر 2022 میں ان کے درمیان طلاق ہوگئی تھی۔ جس کے بعد فیروز خان اور ان کی سابقہ اہلیہ علیزا سلطان کے درمیان بچوں کی تحویل کے معاملے پر عدالت میں تصفیہ ہوا تھا۔
