برطانیہ میں کنگ چارلس کی تاجپوشی کی تقریب کی تیاریاں عروج پر ہیں۔ 6 مئی کو ہونے والی تقریب کو مختلف افراد اپنے اپنے انداز سے منانے کی تیاریوں میں مگن ہیں۔ انگلینڈ میں موجود چاکلیٹ کمپنی نے کنگ چارلس کے مجسمے کی رونمائی کی ہے جسے مکمل طور پر چاکلیٹ سے تیار کیا گیا ہے۔
برطانوی نشریاتی ادارے کی رپورٹ کے مطابق، چاکلیٹ سے بنا مجسمہ مارس رگلی نامی چاکلیٹ کمپنی کے لیے آرٹسٹ جین لنڈسے کلارک نے تیار کیا ہے۔ مجسمے میں شاہ چارلس کے یونیفارم پر موجود شاہی اعزازات کو بنانے کے لیے مارس، ملکی ویز، اسنیکرز، ٹوئکس اور باؤنٹی کے اضافی چھوٹے کینڈی بارز کا استعمال کیا گیا جس سے اس مجسمے کا وزن 51 پاؤنڈز تک پہنچ گیا۔
چاکلیٹ سے کنگ چارلس کے مجسمے کو تیار کرنے میں قریباً ایک مہینہ لگا۔ کنگ چارلس کی تاجپوشی کی تقریب 6 مئی کو لندن کے مشہور ویسٹ منسٹر ایبی میں منعقد کی جائے گی۔ وزیراعظم پاکستان شہباز شریف کو بھی تقریب میں مدعو کیا گیا ہے۔
