چیف جسٹس یحییٰ آفریدی کے بیرون ملک دورے کے پیش نظر سپریم کورٹ کے جسٹس منصور علی شاہ نے قائم مقام چیف جسٹس کا حلف اٹھا لیا ہے۔
سپریم کورٹ کے سینیئر جج جسٹس منیب اختر نے ان سے حلف لیا، حلف برداری کی تقریب میں سپریم کورٹ کے ججز، اٹارنی جنرل، لا افسران اور وکلا شریک ہوئے۔
یہ بھی پڑھیں: ادارے صرف گفت و شنید اور رابطے کے ذریعے ترقی کرسکتے ہیں، جسٹس منصور علی شاہ
بطور قائم مقام چیف جسٹس منصور علی شاہ چیف جسٹس یحییٰ آفریدی کی وطن واپسی تک فرائص انجام دیں گے۔
واضح رہے کہ چیف جسٹس یحییٰ آفریدی 22 تا 26 اپریل کے دوران چین کے شہر ہانگ ژو میں منعقد ہونے والی شنگھائی تعاون تنظیم کے رکن ممالک کی سپریم کورٹس کے چیف جسٹسز کی 20ویں کانفرنس میں شرکت کے لیے رخصت پر ہیں۔
مزید پڑھیں: کسی کے پاس اختیارنہیں کہ وہ سپریم کورٹ کے فیصلے پرعمل نہ کرے، جسٹس منصور علی شاہ
چیف جسٹس یحییٰ آفریدی کے دورہ چین کے دوران سپریم کورٹ پاکستان اور سپریم پیپلز کورٹ چین کے درمیان تاریخی مفاہمتی یادداشت پر دستخط ہوں گے، جس سے عدالتی روابط، تربیت، معلومات کے تبادلے میں پیش رفت ہوگی۔
ترجمان سپریم کورٹ کے مطابق متوقع مفاہمتی یادداشت میں بین الاقوامی تجارتی قوانین ، ثالثی، سائبر کرائم، مالیاتی جرائم سمیت موسمیاتی تبدیلی، عدالتی ٹیکنالوجی اور تنازعات کے حل میں تعاون شامل ہوگا۔
