وزیراعلیٰ پنجاب مریم نواز نے کہا ہے کہ پاک بھارت سرحد پر کشیدگی ہے، لیکن ہمیں گھبرانے کی ضرورت نہیں، دشمن حملہ کرنے سے قبل 10 بار سوچے گا، افواج پاکستان ہر وار کا مقابلہ کرنے کی صلاحیت رکھتی ہیں۔
لاہور میں تقریب سے خطاب کرتے ہوئے مریم نواز نے کہاکہ ہمیں اختلافات بھلا کر پاک فوج کے ساتھ کھڑا ہونا ہوگا، پاکستان کے عوام اور فوج میں اتنی صلاحیت ہے کہ دشمن کا مقابلہ کر سکتے ہیں۔
یہ بھی پڑھیں اسحاق ڈار کا ہنگری کے وزیر خارجہ کو ٹیلیفون، بھارتی پروپیگنڈا مسترد کردیا
انہوں نے کہاکہ ہمیں ایک قوم بن کر اپنی افواج کے ساتھ کھڑا ہونا ہوگا، کوئی بھی پاکستان کی جانب میلی آنکھ سے نہیں دیکھ سکتا۔
مریم نواز نے کہاکہ پاکستان کو طاقتور بنانے میں شہدا اور غازیوں کی قربانیاں شامل ہیں، جبکہ نواز شریف کی کوشش بھی اس میں شامل ہے۔
انہوں نے کہاکہ نواز شریف کے دور میں پاکستان نے ہمیشہ ترقی کی منازل طے کیں، اور مہنگائی میں کمی ہوئی، شہباز شریف نے بھی بجلی سستی کی ہے اور اس ماہ بل کم آئےگا۔
مریم نواز نے کہاکہ نواز شریف نے دباؤ کے باوجود ایٹمی دھماکے کرکے پاکستان کا دفاع ناقابل تسخیر بنا دیا۔
انہوں نے کہاکہ پنجاب میں دو ماہ کے اندر مزید 500 بسیں آرہی ہیں، ہم گوجرانوالہ میں رواں سال میٹرو بس کا منصوبہ شروع کریں گے۔
وزیراعلیٰ پنجاب نے کہاکہ ایک سال کی قلیل مدت میں ہم نے پنجاب میں 30 ہزار گھر بنا دیے ہیں، جو ایک ریکارڈ ہے۔
یہ بھی پڑھیں پہلگام واقعہ: پاکستان کے خلاف مہم جوئی سے انکار پر بھارتی فوج کے جنرل کی چھٹی
انہوں نے مزید کہاکہ پنجاب کے پاس دیگر صوبوں کی نسبت زیادہ وسائل نہیں، اگر گندم کی قیمت 4 ہزار روپے من مقرر کر دوں تو عوام کے لیے مشکل ہو جائےگی۔
