لاہور ایئرپورٹ پر نجی ایئر لائنز کی پرواز حادثے سے بال بال بچ گئی، مسافروں کی چیخیں

لاہور میں طوفان اور موسم کی خرابی کے باعث 2 پروازوں کی روانگی میں تاخیر ہوگئی ہے، جبکہ لاہور پہنچی 2 پروازوں کو کراچی بھیج دیا گیا ہے، شدید طوفان کے باعث نجی ایئرلائنز کی پرواز حادثے سے بال بال بچی۔

یہ بھی پڑھیں: خراب موسم کے باعث لاہور اور اسلام آباد میں فلائٹ شیڈول بری طرح متاثر

نجی ایئرلائنز کی پرواز ایف ایل 942 نے لاہور ایئرپورٹ پر رن وے ٹچ کیا تو طوفان کی زد میں آگئی۔

آندھی کے باعث طیارے کو شدید ہچکولے لگے جس سے مسافروں کی چیخیں نکل گئیں، مسافر کلمہ طیبہ کا ورد کرتے رہے، پرواز کئی منٹ تک طوفان کی زد میں رہی،  انتہائی نامناسب موسم پر طیارے کو واپس کراچی بھیج دیا گیا۔

یہ بھی پڑھیں: پاکستان میں بدترین موسم سے فلائٹ آپریشن درہم برہم، متعدد پروازیں منسوخ، درجنوں تاخیر کا شکار

پائلٹ نے بڑی مہارت سے طیارے کو واپس اڑایا جبکہ ایئر ٹریفک کنٹرول نے طیارے کو واپس کراچی جانے کی ہدایت کی۔

اسکردو سے لاہور آنے والی پرواز پی کے 454 کو بھی منسوخ کردیا گیا، گوانگزو سے لاہور آنےوالی پرواز cz-6037 کو بھی منسوخ کردیا گیا ہے جبکہ کراچی سے لاہور آنے والی نجی ائیرلائن کی پرواز کو ملتان اتار دیا گیا ہے۔

اسلام آباد ایئرپورٹ سے پروازوں کی روانگی منسوخ

دوسری جانب اسلام آباد سے لاہور ایئرپورٹ پہنچی قومی ایئرلائنز کی پرواز کو بھی لاہور میں اترنے کے بجائے کراچی بھیج دیا گیا ہے۔

اسلام آباد میں بارش اور ژالہ باری کے باعث پی آئی اے کی اندرون ملک اور بیرون ملک جانیں والی پروازیں منسوخ کردی گئی ہیں، اسلام آباد انٹرنیشنل ایئرپورٹ سے کراچی، اسکردو اور دبئی جانے والی پروازیں منسوخ کردی گئی ہیں۔