آپ نے چوری کی بہت سی وارداتوں کے بارے میں ضرور سنا ہو گا جیسے پیسے چوری، گھر کا سامان چوری، گاڑی چوری اور عید قربان پر جانور چوری کی وارداتیں لیکن آج ہم آپ کو ایک انتہائی انوکھی چوری کی واردات کے بارے میں بتائیں گے۔
سوشل میڈیا پر ایک ویڈیو وائرل ہو رہی ہے جس میں خاتون جانور کا برتن چوری کر کے لے گئی۔ ویڈیو وائرل ہوئی تو صارفین بھی اس پر دلچسپ تبصرے کیے بغیر نہ رہ سکے۔
ایک صارف نے لکھا کہ مجھے لگا خاتون جانور چوری کر کے لے جائے گی۔ ایک صارف نے مزاحیہ انداز میں لکھا کیا پتہ عید پر خاتون نے زیادہ بریانی بنانی ہو۔
خورشید بانو لکھتی ہیں کہ ان کی بہت بہت مہربانی کہ جانور چھوڑ دیا۔ کئی صارفین یہ کہتے نظر آئے کہ ان لوگوں کی کوئی مجبوری نہیں ہوتی یہ ان کا پیشہ ہے۔ سید کمیل عباس نے کہا کہ اب تو جانور کا برتن بھی محفوظ نہیں ہے۔
واضح رہے کہ اس سے قبل کراچی کے ایڈیشنل سیشن جج ویسٹ سہیل احمد مشوری کی عدالت میں ایک درخواست جمع ہوئی ہے جس میں خاتون مدعی پولیس اہلکاروں کے خلاف شکایت کرتی ہیں۔
درخواست گزار بسمہ زوجہ آصف نے عدالت سے درخواست کی ہے کہ ایس ایچ او انور مہراج اور تھانہ مومن آباد کے دیگر اہلکار بغیر وارنٹ کے ان کے گھر میں داخل ہوئے، خواتین کو ڈرایا دھمکایا، فرنیچر توڑا اور 10 بکرے، ایک ٹی وی، تقریباً 6 تولے سونا اور 80 ہزار روپے نقد لے گئے۔
عدالت نے اس معاملے پر تشویش کا اظہار کیا ہے اورپولیس کے رویے کو افسوسناک قرار دیا ہے اور انکوائری رپورٹ 10 دن کے اندر (عید الاضحیٰ سے پہلے) جمع کرنے کا حکم دیا ہے تاکہ اس طرح کے واقعات دوبارہ نہ ہوں۔
