اسرائیلی ڈیفنس فورس (آئی ڈی ایف) نے اعلان کیا ہے کہ اب ایران کو اسرائیل کے لیے ’مرکزی جنگی محاذ‘ تصور کیا جا رہا ہے، جب کہ غزہ کی پوزیشن ثانوی حیثیت اختیار کر چکی ہے۔
یہ بھی پڑھیں تہران کے مہرآباد ایئرپورٹ پر اسرائیلی حملے کے نتیجے میں آگ بھڑک اٹھی، مزید 2 جنرلز شہید
یہ انکشاف اسرائیل کے ایک اخبار کی حالیہ رپورٹ میں سامنے آیا ہے۔
اسرائیلی فوج کے مطابق حالیہ دنوں میں ایران کے اندر دو اہم فوجی ٹھکانوں کو نشانہ بنایا گیا ہے، جن میں خاطر خواہ نقصان ہوا ہے۔ فوجی ذرائع کا کہنا ہے کہ پچھلے 24 گھنٹوں کے دوران اسرائیلی فضائیہ نے ایران میں 150 سے زیادہ اہداف پر حملے کیے۔
رپورٹ میں دعویٰ کیا گیا ہے کہ اسرائیل نے پہلی بار ایران کی حساس نیوکلیئر تنصیبات، فورڈو اور نوٹنگ کو نشانہ بنایا ہے۔ تاہم یہ بھی تسلیم کیا گیا کہ ان تنصیبات کو اس قدر نقصان نہیں پہنچا جس کی توقع کی جا رہی تھی۔
آئی ڈی ایف کا مزید کہنا ہے کہ ان فضائی حملوں کے نتیجے میں اسرائیلی فضائیہ کو تہران تک رسائی حاصل ہو گئی ہے اور وہ اب ایرانی فضائی حدود میں نسبتاً آزادی سے کارروائیاں کر سکتی ہے۔
ادھر غزہ میں جاری فوجی سرگرمیاں اب پس منظر میں چلی گئی ہیں، اور اسرائیلی فوج کی توجہ کا مرکز ایران بن چکا ہے۔
یہ بھی پڑھیں اسرائیلی حملوں میں مزید 2 ایرانی جنرلز شہید، تعداد 8 ہوگئی
دفاعی تجزیہ کاروں کے مطابق یہ تبدیلی خطے میں ایک بڑے اسٹریٹجک موڑ کی عکاسی کرتی ہے، جو مستقبل میں مشرق وسطیٰ میں کشیدگی کو مزید بڑھا سکتی ہے۔
