مسلم لیگ ن کے رہنماء اور سابق وزیر مملکت عابد شیر علی نے سابق چیف جسٹس ثاقب نثار کی گرفتاری کا مطالبہ کر دیا۔ انہوں نے سپریم کورٹ کے سابق ججز آصف سعید کھوسہ اور جسٹس گلزار کے خلاف بھی کارروائی کا مطالبہ کیا ہے۔ کہا اس وقت منتخب وزیر اعظم کو سازش کے تحت نا اہل قرار دیا گیا تھا۔
نیشنل پریس کلب اسلام آباد میں نیوز کانفرنس سے خطاب کے دوران عابد شیر علی کا کہنا تھا کہ 2017 میں ترقی کرتے پاکستان کو ذاتی مفاد کی خاطر داؤ پر لگایا گیا اور سازشی کو مسیحا بنا کر پیش کیا گیا۔
عابد شیر علی کا کہنا تھا گزشتہ دور کے مالیاتی سکینڈلز کی فوری تحقیقات کی جائیں اور پی ٹی آئی کے ٹکٹوں کی فروخت اور مالیاتی سکینڈلز میں شامل تمام کرداروں کو فوری گرفتار کیا جائے۔ ان کا کہنا تھا، ان اقدامات سے پارلیمنٹ اپنی بالادستی ثابت کرے۔
سابق وفاقی وزیر کا کہنا تھا کہ گزشتہ دور حکومت میں سی پیک منصوبوں کو روک کر پاکستان کو تنہائی میں پھینکا گیا۔ پاکستان کی ترقی اور خوشحالی کے خلاف سازش کرنے والوں کے خلاف آرٹیکل 6 کے تحت مقدمات بنائے جائیں اور فوری گرفتاریاں عمل میں لائی جائیں۔
