آزاد کشمیر کے دارالحکومت مظفرآباد میں شہری نے ذاتی خرچ سے کروڑوں روپے کی مالیت کا پارک بنانے کی پیشکش کی مگر حکومت نے ابھی تک اس شہری کو پارک تعمیر کرنے کی اجازت نہیں دی۔
پارک کی حالت دیکھ کر تکلیف سے گزرنا پڑتا ہے، راشد زرگر اعوان
راشد زرگر اعوان نے ’وی نیوز‘ سے گفتگو کرتے ہوئے کہاکہ جب میں چھوٹا تھا تو اس پارک میں کھیلا کرتا تھا۔ آج اس پارک کی حالت دیکھ کر مجھے تکلیف سے گزرنا پڑتا ہے۔ میں چاہتا ہوں یہاں خواتین اور بچوں کے لیے ایک جدید پارک تعمیر کرسکوں تاکہ تفریحی مواقع میسر آسکیں۔
انہوں نے کہاکہ میں نے بلدیہ حکام کو اس کی اجازت کے لیے ایک درخواست بھی دے رکھی ہے مگر مجھے اجازت نہیں ملی۔
راشد زرگر اعوان ٹالی منڈی کے اس مقام پر پارک بنانا چاہتے ہیں جہاں کبھی ’نیلم پارک‘ ہوا کرتا تھا جو 1992 کے خوفناک سیلاب میں تباہ ہو گیا تھا۔
اس کے بعد یہ جگہ یا تو کچرے کا مرکز بنی رہی ہے یا قبضہ مافیا کے زیرِ استعمال ہے۔ حکومت نے اس زمین کو ’خواتین پارک‘ کے لیے مختص کر رکھا ہے۔ گزشتہ حکومت نے 16 کروڑ روپے کا پی سی ون بھی تیار کیا تھا لیکن عملی طور پر آج تک کوئی کام شروع نہیں ہو سکا۔
’پارک کے ایک حصے پر پھینکا جانے والا کچرا دریائے نیلم میں جانے لگا‘
پارک کے ایک حصے پر بلدیہ شہر بھر کا کچرا لا کر پھینکتا ہے، جو آہستہ آہستہ دریائے نیلم میں جا رہا ہے جو ماحول کے لیے انتہائی خطرناک ثابت ہو سکتا ہے۔
پارک کے دوسرے حصے پر ایک تعمیراتی کمپنی نے غیر قانونی قبضہ جما رکھا ہے، جس کو بظاہر چند ماہ کی اجازت دی گئی تھی، مگر اب سالوں سے وہاں ڈھٹائی سے قابض ہے۔
پارک بنانے کے لیے ہمارے پاس وسائل نہیں، میئر بلدیہ سکندر گیلانی
میئر بلدیہ سکندر گیلانی کہتے ہیں کہ ہمارے پاس شہر کے اندر کوئی بڑا جدید پارک موجود نہیں، بلدیہ کے پاس اس طرح کا پارک بنانے کے وسائل موجود نہیں ہیں تاہم حکومت یہ پارک بنا سکتی ہے۔
’ایک شہری کی جانب سے جو پیشکش آئی تھی وہ حکومت کے سامنے رکھی ہے، اس اجازت نامے کا اختیار حکومت کے پاس ہی ہے۔‘
سکندر گیلانی نے کہاکہ مظفرآباد شہر کی آبادی 3 لاکھ سے تجاوز کر چکی ہے لیکن یہاں خواتین کے لیے کوئی بڑا پارک موجود نہیں ہے۔ خواتین اور بچے محفوظ، کھلی اور صاف تفریحی جگہوں کے فقدان کا شکار ہیں۔
انہوں نے کہاکہ خواتین اور بچے صحت مند سرگرمیوں کے لیے دریا کنارے جا کر اپنا وقت گزارنے پر مجبور ہیں، جو بچوں کے لیے انتہائی خوفناک بھی ہے۔
حکومت پارک کی تعمیر کے لیے فوری اجازت نامہ جاری کرے، مقامی افراد کا مطالبہ
مقامی رہائشیوں کا مطالبہ ہے کہ حکومت اس پارک کی تعمیر کے لیے فوری اجازت نامہ جاری کرے یا حکومت خود پارک کی تعمیر کرے تاکہ خواتین کو محفوظ اور پُرامن تفریحی کے لیے پارک کی سہولت میسر آسکے۔ مزید جانیے نصیر چوہدری کی اس رپورٹ میں۔
