آئی سی سی کی مردوں کی ٹیسٹ پلیئر رینکنگ میں ایک بڑی تبدیلی دیکھنے میں آئی ہے، جہاں انگلینڈ کے ہیری بروک نے شاندار کارکردگی کے بعد جو روٹ کو پیچھے چھوڑتے ہوئے ایک مرتبہ پھر ٹیسٹ بیٹنگ میں پہلی پوزیشن حاصل کر لی ہے۔
برمنگھم میں بھارت کے خلاف دوسرے ٹیسٹ میچ میں بروک نے پہلی اننگز میں شاندار 158 رنز بنائے، جس کے باعث وہ رینکنگ میں سرفہرست آ گئے، جبکہ جو روٹ 18 ریٹنگ پوائنٹس کے فرق کے ساتھ دوسرے نمبر پر چلے گئے۔
یہ بھی پڑھیں:آئی پی ایل میں پابندی لگنے پر انگلینڈ کے کپتان ہیری بروک کا ردعمل سامنے آگیا
ایجبسٹن ٹیسٹ میں بھارت کے شبھمن گل نے بھی رینکنگ میں زبردست بہتری حاصل کی، بھارتی کپتان نے دوسرے ٹیسٹ میں 269 اور 161 رنز کی شاندار اننگز کھیل کر نہ صرف اپنی ٹیم کو بطور کپتان پہلی فتح سے ہمکنار کیا بلکہ رینکنگ میں 15 درجے ترقی پاکر اپنے کیریئر کی بلند ترین چھٹی پوزیشن پر پہنچ گئے۔
Harry Brook reclaims the 🔝 spot in the latest ICC Test batter rankings after his spirited knock against India 👏
More ➡️ https://t.co/Df4PDR7PNf pic.twitter.com/ZxZnEazGXR
— ICC (@ICC) July 9, 2025
شبھمن گل اب صرف 79 ریٹنگ پوائنٹس کے فرق سے ہیری بروک سے پیچھے ہیں، جبکہ ان سے آگے صرف جو روٹ، کین ولیمسن، یشسوی جیسوال اور اسٹیو اسمتھ ہیں۔
انگلینڈ کے جیمی اسمتھ نے بھی زبردست کارکردگی دکھاتے ہوئے 16 درجے ترقی کی اور ٹاپ 10 میں شامل ہوگئے۔ انہوں نے ناقابل شکست 184 اور 88 رنز کی اننگز کھیل کر 10ویں پوزیشن حاصل کی۔
بولنگ کے شعبے میں بھارت کے جسپریت بمرا اگرچہ برمنگھم ٹیسٹ میں آرام کی غرض سے شامل نہیں ہوئے، پھر بھی وہ ٹیسٹ بولرز کی رینکنگ میں سرفہرست ہیں، ان کے ہم وطن محمد سراج نے بھی شاندار کارکردگی دکھاتے ہوئے 6 درجے ترقی حاصل کی اور اب وہ 22 ویں نمبر پر ہیں۔
مزید پڑھیں:کون کتنے پانی میں ہے؟ آئی سی سی کی نئی رینکنگ نے بھید کھول دیا
ویسٹ انڈیز کے شمر جوزف اور الزاری جوزف نے بھی 6 درجے ترقی کی، اور بالترتیب 29 ویں اور 31 ویں پوزیشن پر پہنچ گئے۔
پاکستان کے نعمان علی ٹیسٹ بولرز کی ٹاپ 10 رینکنگ میں شامل واحد پاکستانی کھلاڑی ہیں۔
ادھر ون ڈے رینکنگ میں بھی تبدیلیاں دیکھنے میں آئیں۔ سری لنکا کے چریتھ اسالنکا نے بنگلادیش کے خلاف 2-1 سے سیریز جیتنے میں اہم کردار ادا کیا، جس کے بعد وہ 2 درجے بہتری کے ساتھ چھٹی پوزیشن پر آ گئے ہیں اور اب صرف شبھمن گل سے پیچھے ہیں، جو اس وقت نمبر 1 ون ڈے بیٹر ہیں۔
مزید پڑھیں:آئی سی سی رینکنگ: ٹی 20 کی ٹاپ 20 فہرست سے پاکستانی بولرز غائب
سری لنکا کے ایک اور بیٹر، کوسل مینڈس نے بھی نمایاں کارکردگی کے باعث 10 درجے ترقی کی اور اب وہ 10ویں پوزیشن پر ہیں، انہوں نے بنگلہ دیش کے خلاف پلیئر آف دی سیریز کا اعزاز حاصل کیا تھا۔
پاکستان کے بابر اعظم بدستور ون ڈے بیٹرز کی رینکنگ میں دوسرے نمبر پر موجود ہیں۔
یہ تازہ ترین تبدیلیاں ظاہر کرتی ہیں کہ ٹیسٹ اور ون ڈے رینکنگ میں نئی ابھرتی ہوئے کھلاڑیوں کا عروج جاری ہے، جبکہ پرانے نام بھی اپنی برتری برقرار رکھنے کی کوشش میں مصروف ہیں۔
