اسٹار فش کا نہ تو دماغ ہوتا ہے اور نہ ہی خون، یہ پڑھ کر شاید آپ کو بھی عجیب لگے کہ ایک جاندار چیز دماغ اور خون کے بغیر کیسے زندہ رہ سکتی ہے۔
آج ہم آپ کو اسٹار فش کے بارے میں ایسی دلچسپ معلومات بتائیں گے جسے پڑھ کر آپ حیران ہوتے چلے جائیں گے۔
سٹار فش کا نام تو اسٹار فش ہے لیکن اس کے باوجود یہ ایک مچھلی نہیں ہے۔ سٹار فش کی باقی مچھلیوں کی طرح گلز،اسکیلز یا فِنز نہیں ہوتے اور نہ ہی ان کی ریڑھ کی ہڈی ہوتی ہے۔
اسٹار فش مختلف سائز،شکلوں اور رنگوں کی ہوتی ہے۔ ان کی 2 ہزار سےزائد اقسام ہیں۔
اسٹار فش کا نہ تو دماغ ہوتا ہے اور نہ ہی خون لیکن اس کے باوجود یہ زندہ کیسے رہتی ہے؟
اسٹار فش سمندر کا پانی اپنے اندر پمپ کرتی ہے۔ سمندر کا پانی اسٹار فش کے جسم میں خون کے متبادل کے طور پر کام کرتا ہے یہ پانی اسٹار فش کو اہم غذائی اجزا فراہم کرتا ہے۔
اسٹار فش کے بارے میں اب جو بات آپ پڑھیں گے یہ آپ کو مزید حیران کر دے گی۔ کیا آپ جانتے ہیں کہ اسٹار فش اپنے بازو دوبارہ بنانے کی صلاحیت رکھتی ہے۔ جی ہاں! بالکل ایسا ہی ہے۔ اگرکوئی شکاری اسٹار فش پرحملہ آور ہوجائے تو اسٹار فش خود کو بچانے کے لیے اپنے جسم کے اس حصے کو کاٹ دیتی ہے اور وہاں سے فرار ہوجاتی ہے۔
لیکن اسٹار فش کے بازو کو دوبارہ پیدا ہونے میں مہنیوں یا سال بھی لگ سکتے ہیں۔ اسی لیے بازو سے محروم ہوجانے کی وجہ سے اسے سنگین صورتحال کا سامنا کرنا پڑسکتا ہے۔
آپ نے اسٹار فش کےعام طور پر 5 ہی بازو دیکھیں ہوں گے لیکن ایسا نہیں، کچھ اسٹار فش ایسی بھی ہوتی ہیں جن کے 40 بازو بھی ہوسکتے ہیں جیسے سن اسٹار۔
اسٹار فش کی آنکھیں ان کے بازوؤں کے آخر میں واقع ہوتی ہیں۔ ان کی آنکھیں چھوٹے سرخ نقطوں کی طرح نظر آتی ہیں۔
اسٹار فش کو مسلز،کلیمز،گھونگے اور برنکلز جیسی چیزیں کھانا پسند ہے۔
اسٹار فش کے ہر بازو کے آخر میں سیکڑوں چھوٹے چھوٹے پاؤں ہوتے ہیں۔ اس نے جب چلنا ہو تو وہ اپنے چھوٹے چھوٹے پیروں کو پانی سے بھر دیتی ہے۔
اسٹار فش کی جلد کیلشیم کاربونیٹ سے بنی ہوتی ہے جس کی وجہ سے اس کی جلد چمڑے کی طرح سخت ہوتی ہے۔ اسٹار فش کی سخت جلد کی وجہ سے شکاریوں کے لیے اسے کھانا مشکل ہوجاتا ہے۔
