چیئرمین سی ڈی اے و چیف کمشنر اسلام آباد محمد علی رندھاوا کی زیر صدارت سی ڈی اے ہیڈکوارٹرز میں ایک اہم اجلاس منعقد ہوا۔
اجلاس میں سی ڈی اے بورڈ کے ممبران، متعلقہ ڈی جیز، ڈپٹی کمشنر اسلام آباد، ایکسائز اینڈ ٹیکسیشن آفیسرز، آئی سی ٹی اور دیگر سینئر افسران نے شرکت کی۔
یہ بھی پڑھیں:اب لاہور سے اسلام آباد کی مسافت 100 کلومیٹر کم ہوگی، وفاقی وزیر کا اعلان
اجلاس میں اسلام آباد میں ڈیجیٹل پارکنگ، گاڑیوں پر ایم ٹیگ کے نفاذ اور کیش لیس ٹرانزیکشنز پر تبادلہ خیال کیا گیا۔
اجلاس میں فیصلہ کیا گیا کہ اسلام آباد میں داخل ہونے والی تمام گاڑیوں پر ایم ٹیگ لگانا لازمی ہوگا۔ ایم ٹیگ کے بغیر کسی بھی گاڑی کو اسلام آباد میں داخلے کی اجازت نہیں دی جائے گی۔
اس کے علاوہ ڈیجیٹل پارکنگ کا نفاذ عمل میں لایا جائے گا، اور پارکنگ میٹرز لگائے جائیں گے۔ رش والی جگہوں پر پارکنگ کے چارجز زیادہ ہوں گے۔
چیئرمین سی ڈی اے و چیف کمشنر اسلام آباد محمد علی رندھاوا نے ٹریفک سروے، اسلام آباد میں روزانہ کی بنیاد پر داخل اور خارج ہونے والی گاڑیوں کا سروے کرنے کی ہدایت کی۔
انہوں نے کہا کہ اسلام آباد میں ڈیجیٹل پارکنگ سسٹم کا آغاز کیا جا چکا ہے۔ اس نظام کو مزید مؤثر بنانے کے لیے ایک موبائل ایپ یا آن لائن پلیٹ فارم متعارف کرایا جائے گا، جس کے ذریعے شہری پارکنگ کی جگہ کیش لیس ٹرانزیکشنز کے ذریعے بک کروا سکیں گے۔ اس سے نہ صرف وقت کی بچت ممکن ہوگی بلکہ سڑکوں پر ٹریفک کے دباؤ میں بھی کمی آئے گی۔
یہ بھی پڑھیں:اسلام آباد میں موسلادھار بارش سے تباہی، گاڑیاں نالے میں بہہ گئیں
انہوں نے کہا کہ اسلام آباد کے مختلف تجارتی مراکز اور معروف علاقوں میں شہری ڈیجیٹل طریقے سے پارکنگ کرسکیں گے۔ اس سسٹم کے تحت شہری موبائل ایپ یا کیو آر (QR) کوڈ کے ذریعے اپنی پارکنگ فیس ادا کرسکیں گے۔ اس جدید نظام سے پارکنگ کی تلاش میں وقت کے ضیاع کے خاتمے کے ساتھ ساتھ غیر قانونی پارکنگ پر قابو پانے میں بھی مدد ملے گی۔
انہوں نے کہا کہ سی ڈی اے ون ونڈو فیسلیٹیشن سینٹر پر کیش لیس پیمنٹ سسٹم متعارف کروا رہا ہے، جہاں اب شہری مختلف خدمات جیسے پارکنگ فیس، فیسوں کی ادائیگی، پراپرٹی اور بجلی کے بلز کی ادائیگی موبائل ایپس، بینک کارڈز یا کیو آر (QR) کوڈ اسکین کر کے کرسکیں گے، جس کے لیے جدید ڈیجیٹل سسٹم متعارف کروایا جائے گا۔
چیئرمین سی ڈی اے محمد علی رندھاوا نے کہا کہ ہم اسلام آباد کو سیف اور سمارٹ شہر بنانے کے لیے کوشاں ہیں۔
یہ بھی پڑھیں:اسلام آباد: دھواں دیتی گاڑیوں کے مالکان کے لیے انتظامیہ کی خاص ہدایت
ایم ٹیگ کے نفاذ، ڈیجیٹل پارکنگ اور کیش لیس نظام سے نہ صرف عوام کو پارکنگ کے مسائل کے حل میں مدد ملے گی بلکہ اسلام آباد کی مجموعی سیکورٹی کی صورتحال میں بھی بہتری آئے گی۔
نیز، ڈیجیٹل پارکنگ، ایم ٹیگ اور کیش لیس ٹرانزیکشنز کے نظام جیسے اقدامات کی بدولت اسلام آباد کو ایک جدید، سمارٹ اور مثالی دارالحکومت بنانے میں مدد ملے گی۔
