وفاقی وزیر اطلاعات و نشریات مریم اورنگزیب نے کہا ہے کہ تحریک انصاف پر پابندی لگانے سے متعلق کوئی بات نہیں ہوئی لیکن جو لوگ ملک پر حملہ آور ہوں گے، ان کے خلاف قانونی کارروائی کی جائے گی۔
مریم اورنگزیب نےایک نجی ٹیلی ویژن چینل کے پروگرام میں گفتگو کرتے ہوئے کہا کہ تحریک انصاف نے سوچی سمجھی منصوبہ بندی کے تحت کارکنوں کو اکسا کرمختلف اداروں پر حملہ کرنے کے لیے بھیجا۔
انہوں نے کہا کہ یہ کوئی سیاسی احتجاج نہیں لیکن جو لوگ ملک پر حملہ آور ہوں گے ان کے خلاف قانونی کاروائی کی جائے گی۔
سابق وزیر اعظم عمران خان کی گرفتاری کے حوالے سے بات کرتے ہوئے انہوں نے کہا کہ
عمران خان کی گرفتاری سیاسی انتقام نہیں ہے۔ انہوں نے مزید کہا کہ تحریک انصاف پر پابندی لگانے سے متعلق کوئی بات چیت نہیں ہوئی۔
