وزیر اعلیٰ پنجاب مریم نواز شریف نے جاپان کے شہر یوکوہاما کے دورے کے دوران ماحولیاتی آلودگی کے خاتمے، جدید شہری ترقی اور انفراسٹرکچر کی بہتری کے لیے جاپان کے تجربات سے استفادہ کرنے کا فیصلہ کیا ہے۔
یہ بھی پڑھیں:وزیر اعلیٰ مریم نواز کا دورہ بیجنگ، چینی کمپینیاں پاکستان میں کتنے ارب روپے کی سرمایہ کاری کریں گی؟
یوکوہاما کے ٹاؤن ہال میں وزیراعلیٰ پنجاب اور ان کے وفد کو شہری ترقی کے جدید ماڈلز پر تفصیلی بریفنگ دی گئی، اس موقع پر یوکوہاما اور پنجاب کے درمیان’سٹی ٹو سٹی‘ تعاون پر اتفاق کیا گیا، جس کے تحت ماحولیات، شہری ترقی، سڑکوں اور عمارتوں کے معیار کو جدید خطوط پر استوار کرنے کے منصوبوں پر مشترکہ کام کیا جائے گا۔
وزیراعلیٰ پنجاب مریم نواز شریف کا یوکوہاما ٹاؤن ہال کا دورہ، جاپانی ماڈل پر اربن ڈویلپمنٹ، ریلوے اپ گریڈیشن اور جدید ٹرانسپورٹ کے شعبوں میں تعاون کے امکانات پر تبادلہ خیال۔#CMMaryamInJapan pic.twitter.com/CWTLntqH4J
— Marriyum Aurangzeb (@Marriyum_A) August 18, 2025
دورے کے دوران راوی اربن ڈویلپمنٹ اتھارٹی اور یوکوہاما حکام کے درمیان ممکنہ اشتراک پر بھی غور کیا گیا، جبکہ لاہور اور اسلام آباد کے درمیان تیز رفتار ٹرین اور پاکستان ریلوے کی اپ گریڈیشن میں تعاون کے امکانات کا جائزہ لیا گیا، وزیراعلیٰ مریم نواز نے جاپانی طرز کی جدید چیئر لفٹ اور ایئر کیبن منصوبوں کا بھی معائنہ کیا۔
یہ امر قابل ذکر ہے کہ یوکوہاما جاپان کا دوسرا بڑا شہر ہے جو ٹوکیو اور کاواساکی کے ساتھ ملک کے صنعتی زون کا حصہ ہے۔ ایشیائی ترقیاتی بینک نے رواں سال مئی میں یوکوہاما کو ماحولیاتی بہتری کے لحاظ سے ایشیا کا سب سے ترقی یافتہ شہر قرار دیا تھا۔
مزید پڑھیں: چین کی 60 بڑی کمپنیاں پنجاب میں سرمایہ کاری پر آمادہ، مریم نواز نے خوشخبری سنادی
وزیراعلیٰ مریم نواز شریف کا یہ جاپان کا 5 روزہ سرکاری دورہ ہے، جس کا مقصد پنجاب کو جدید شہری ترقی اور ماحولیاتی بہتری کے بین الاقوامی معیار سے ہم آہنگ کرنا ہے۔
