کینیڈا نے جمعے کے روز اعلان کیا ہے کہ وہ امریکا پر عائد 25 فیصد کے بیشتر جوابی محصولات واپس لے رہا ہے، تاہم امریکی گاڑیوں، اسٹیل اور ایلومینیم پر ٹیکس فی الحال برقرار رہیں گے۔
کینیڈین وزیرِاعظم مارک کارنی نے پریس کانفرنس میں بتایا کہ یہ فیصلہ یکم ستمبر سے نافذ ہوگا۔
یہ بھی پڑھیں:ٹرمپ ٹیرف وار: کینیڈا نے امریکی گاڑیوں پر 25 فیصد ٹیرف لگادیا
ان کا کہنا تھا کہ کینیڈا نے امریکہ کے ساتھ موجودہ تجارتی معاہدے میں سب سے بہتر شرائط حاصل کی ہیں اور اب توجہ صرف ’اسٹریٹجک سیکٹرز‘ پر مرکوز ہے۔
پس منظر
کینیڈا نے مارچ میں امریکہ کے اسٹیل اور ایلومینیم پر عائد 25 فیصد ڈیوٹی کے جواب میں تقریباً 21.7 ارب ڈالر مالیت کی امریکی مصنوعات پر جوابی محصولات عائد کیے تھے۔ یہ اقدام سابق وزیراعظم جسٹن ٹروڈو کے دور میں اٹھایا گیا تھا۔
امریکی صدر ڈونلڈ ٹرمپ نے جولائی میں کینیڈا پر ٹیکس بڑھا کر 35 فیصد کرنے کا اعلان کیا تھا اور الزام لگایا تھا کہ اوٹاوا فینٹانائل کی اسمگلنگ اور سیکیورٹی امور پر امریکہ کے ساتھ تعاون نہیں کر رہا۔
امریکا کا ردِعمل
وائٹ ہاؤس کے ایک اہلکار نے کینیڈا کے فیصلے کو انتہائی تاخیر سے کیا گیا مگر خوش آئند قدم قرار دیا اور کہا کہ امریکا اس موقع کو دونوں ممالک کے درمیان تجارتی اور سیکیورٹی خدشات پر مزید بات چیت کے لیے استعمال کرے گا۔
ٹرمپ-کارنی رابطہ
یہ اعلان صدر ٹرمپ اور وزیرِاعظم کارنی کے درمیان ہونے والی فون کال کے بعد سامنے آیا ہے۔ دونوں رہنماؤں نے اس گفتگو کو ’کارآمد اور وسیع البنیاد‘ قرار دیا اور جلد دوبارہ ملاقات پر اتفاق کیا۔
کارنی نے کہا کہ صدر ٹرمپ نے انہیں یقین دلایا ہے کہ جوابی محصولات ختم کرنے سے دو طرفہ مذاکرات کے نئے مرحلے کا آغاز ہوگا۔
تجارتی معاہدہ زیرِ نظر
یہ پیشرفت اس وقت سامنے آئی ہے جب امریکا-میکسیکو-کینیڈا تجارتی معاہدے (USMCA) کا باضابطہ جائزہ آئندہ چند ماہ میں ہونا ہے، جو ٹرمپ نے اپنے پہلے دورِ صدارت میں طے کیا تھا۔
