عالمی بینک نے پاکستان کے لیے 4 کروڑ 79 لاکھ ڈالر کی گرانٹ منظور کر لی ہے، جو پنجاب میں تعلیم کے فروغ اور اسکول سے باہر بچوں کو تعلیمی نظام میں شامل کرنے کے لیے استعمال کی جائے گی۔
یہ بھی پڑھیں: ورلڈ بینک نے پاکستانی ٹیکس نظام کو ’بیہودہ‘ قرار دیکر اس میں اصلاحات کا مشورہ دے دیا
عالمی بینک کے مطابق یہ رقم گلوبل پارٹنرشپ فار ایجوکیشن فنڈ کے تحت فراہم کی جارہی ہے، جس سے 40 لاکھ سے زائد بچے مستفید ہوں گے، جن میں پری پرائمری اور پرائمری سطح کے طلبہ شامل ہیں۔
منصوبے کا بنیادی مقصد بچوں کی ابتدائی تعلیم تک رسائی بڑھانا، اسکول سے باہر بچوں کی دوبارہ شمولیت یقینی بنانا اور معذور بچوں کے لیے تعلیمی نظام کو مزید مضبوط بنانا ہے۔ اس کے تحت 80 ہزار اسکول سے باہر بچے اور 1 لاکھ 40 ہزار خصوصی بچوں کو براہِ راست فائدہ پہنچے گا، جبکہ 30 لاکھ سے زیادہ سرکاری اسکولوں کے طلبہ اور 8.5 لاکھ غیر رسمی تعلیمی اداروں کے بچے بھی منصوبے میں شامل ہوں گے۔
یہ بھی پڑھیں: ورلڈ بینک نے پاکستان کے ذمہ قرضوں میں اضافے کی پیش گوئی کردی
مزید برآں، منصوبے کے تحت 1 لاکھ اساتذہ اور اسکول لیڈرز کو تربیت اور پیشہ ورانہ ترقی کے مواقع فراہم کیے جائیں گے تاکہ تعلیمی معیار میں بہتری لائی جا سکے۔
ورلڈ بینک کا کہنا ہے کہ یہ منصوبہ پنجاب میں نظامِ تعلیم کی اصلاحات کے ساتھ ساتھ صوبے کی پائیدار تعلیمی ترقی میں ایک اہم سنگِ میل ثابت ہوگا اور یہ اقدام حکومتِ پنجاب کے تعلیمی اصلاحاتی ایجنڈے سے ہم آہنگ ہے۔
