پاکستان کرکٹ ٹیم کے کپتان سلمان علی آغا نے اعلان کیا ہے کہ ایشیا کپ کے فائنل کی میچ فیس بھارتی حملوں میں جاں بحق ہونے والے پاکستانی شہریوں اور بچوں کے لواحقین کو عطیہ کی جائے گی۔
میچ کے بعد پریس کانفرنس میں گفتگو کرتے ہوئے انہوں نے کہا کہ بھارتی رویہ پورے ٹورنامنٹ میں انتہائی ’مایوس کن‘ رہا۔
سلمان آغا کے مطابق بھارت نے جو کچھ اس ٹورنامنٹ میں کیا وہ کرکٹ کی توہین ہے، ہاتھ نہ ملانا ہمیں نہیں بلکہ کھیل کے احترام کو نشانہ بنانا ہے۔
یہ بھی پڑھیں: بھارت نے پاکستان کو ہرا کر ایشیا کپ 2025 جیت لیا
’اچھی ٹیمیں ایسا نہیں کرتیں، ہم نے خود ہی ٹرافی کے ساتھ تصاویر بنوائیں تاکہ اپنی ذمہ داری پوری کریں۔‘
پاکستانی کپتان نے مزید کہا کہ انہیں بھارتی کپتان سوریا کمار یادیو سے ذاتی طور پر کوئی مسئلہ نہیں، بلکہ یقین ہے کہ اگر یہ فیصلہ یادیو پر ہوتا تو وہ ضرور ہاتھ ملاتے۔
The Pakistan Cricket Team has dedicated its Asia Cup final match fees to the innocent victims martyred in the May 7 attack, in which civilians, including children, lost their lives. Our thoughts and prayers are with their families.
— Pakistan Cricket (@TheRealPCB) September 28, 2025
’ٹورنامنٹ کے آغاز پر اور ریفری میٹنگ میں سوریا کمار نے مجھ سے ہاتھ ملایا تھا لیکن کیمروں کے سامنے وہ ایسا نہیں کر سکے، مجھے یقین ہے کہ یہ ان کے ذاتی فیصلے نہیں بلکہ دی گئی ہدایات پر عمل تھا۔‘
مزید پڑھیں:ایشیا کپ فائنل سے قبل روایتی ٹرافی فوٹو شوٹ، بھارتی ٹیم شریک نہ ہوئی
سلمان آغا کے مطابق کرکٹ کی تاریخ میں یہ پہلا موقع ہے کہ کسی ٹیم نے ہاتھ ملانے سے انکار کیا ہو، جو کھیل کی روح کے منافی ہے۔
’جو کچھ ہوا، وہ بچوں اور شائقین کے لیے غلط پیغام ہے، ہم سب رول ماڈل ہیں اور اس طرح کا رویہ کسی طور درست نہیں۔‘
واضح رہے کہ ایشیا کپ کے فائنل میں بھارت نے پاکستان کو سنسنی خیز مقابلے کے بعد آخری اوور میں شکست دی، تاہم میچ سے قبل اور بعد دونوں ٹیموں نے ہاتھ ملانے سے گریز کیا اور الگ الگ حلقوں میں کھڑی رہیں۔
مزید پڑھیں: ایشیا کپ جیتنے پر بی سی سی آئی نے بھارٹی کرکٹ ٹیم پر انعامات کی بارش کردی
پریس کانفرنس کے اختتام پر پاکستانی کپتان نے ایک بار پھر اعادہ کیا کہ ٹیم اپنی میچ فیس بھارتی حملوں میں متاثرہ پاکستانی خاندانوں کو عطیہ کرے گی۔
’یہ فیصلہ ہم سب نے مل کر کیا ہے تاکہ ان شہریوں اور بچوں کے لواحقین کے ساتھ اظہار یکجہتی کیا جا سکے جو بھارتی حملوں میں شہید ہوئے۔‘
