وزیرِ دفاع خواجہ آصف نے کہا ہے کہ بھارت کی طرف سے کسی قسم کے ایڈونچر کو خارج از امکان قرار نہیں دیا جا سکتا۔
نجی ٹی وی سے گفتگو کرتے ہوئے انہوں نے کہاکہ بھارت کسی بھی ایڈونچر سے پہلے یہ ضرور سوچے گا کہ جواب میں اسے کیا نقصان اٹھانا پڑ سکتا ہے۔
یہ بھی پڑھیں: پاک بھارت جنگ بندی وقتی، یہ محاذ کسی وقت بھی دوبارہ کھل سکتا ہے، خرم دستگیر خان
خواجہ آصف نے کہا کہ سیاسی طور پر مودی کو بھارت میں بہت زیادہ نقصان ہو رہا ہے اور ہم نے بھارت کو جو نقصان پہنچانا تھا، پہنچا دیا۔ اُن کے بقول بھارت کے عوام بھی اس سے پوچھ رہے ہیں کہ ملک کے ساتھ کیا کِیا ہے۔
وزیرِ دفاع نے مزید کہا کہ بھارت عالمی سطح پر تنہا ہو رہا ہے جبکہ پاکستان کو مختلف ممالک کی طرف سے پذیرائی مل رہی ہے۔
خواجہ آصف نے کہا کہ بھارت سمجھتا تھا کہ ہمارا کوئی مقابلہ نہیں اور وہ خود کو خطے کا لیڈر سمجھتے تھے۔
واضح رہے کہ گزشتہ روز بھارتی آرمی چیف نے پاکستان کو دھمکی دیتے ہوئے کہا تھا کہ نیا تنازع ہوا تو صبر نہیں کریں گے، پاکستان کو دنیا کے نقشے سے مٹا دیا جائےگا۔
بھارتی آرمی چیف کے بیان پر افواج پاکستان نے سخت ردعمل دیتے ہوئے کہا تھا کہ بھارتی سیکیورٹی اسٹیبلشمنٹ کے بیانات پر ہمیں سخت تشویش ہے، اب اگر بھارت کی جانب سے کوئی ایڈونچر کیا گیا تو بغیر کسی ہچکچاہٹ کے سخت جواب دیا جائےگا۔
بھارتی آرمی چیف کی دھمکی پر وزیر دفاع خواجہ آصف اور سعد رفیق کا کہنا تھا کہ اب اگر بھارت نے پاکستان پر حملہ کیا تو اس بار طیارے گرنے کا اسکور پہلے سے زیادہ ہوگا۔
یہ بھی پڑھیں: پاک بھارت جنگ میں 7 طیارے تباہ ہوئے: ٹرمپ نے ایک بار پھر ذکر چھیڑ دیا
یہ بھی یاد رہے کہ رواں برس مئی میں ہونے والی جنگ میں بھارت کو شکست کا سامنا کرنا پڑا تھا، اور پاکستان نے دشمن کے 6 جنگی جہاز گرانے کے ساتھ ساتھ کئی اہم ملٹری تنصیبات بھی تباہ کی تھیں۔
