بنوں کے مغل کوٹ سیکٹر میں سیکیورٹی فورسز نے خفیہ معلومات کی بنیاد پر ایک کامیاب کارروائی کے دوران فتنۂ خوارج کے خطرناک گروپ طارق کچھی گروپ کو نشانہ بنایا۔
یہ بھی پڑھیں:افغان کرکٹرز ہلاکت ڈاراما: دہشتگرد ’اگلی اننگ‘ نہیں کھیل پائیں گے، جواب اسی شدّت سے دیا جاتا رہے گا
سیکیورٹی ذرائع کے مطابق آپریشن کے دوران کمانڈر طارق کچھی اور اُس کا قریبی ساتھی حکیم اللہ عرف ٹائیگر مارے گئے۔ ذرائع کے مطابق کارروائی کے دوران خوارج کے ٹھکانے سے بھاری مقدار میں اسلحہ اور گولہ بارود بھی برآمد کیا گیا۔
ذرائع کا کہنا ہے کہ کمانڈر طارق کچھی کی تشکیل گزشتہ 2 برس سے مختلف دہشتگرد کارروائیوں میں سرگرم تھا اور وہ طالبان کے لیے بھتہ خوری میں بھی ملوث تھا۔
مزید بتایا گیا کہ طارق کچھی غیر ملکی دہشتگردوں کا سہولت کار تھا اور افغانستان سے پاکستان میں دہشتگردوں کی دراندازی میں کلیدی کردار ادا کرتا تھا۔
سیکیورٹی فورسز کے مطابق اس کامیاب کارروائی سے خوارج کے نیٹ ورک کو بڑا دھچکا لگا ہے اور سرحد پار سے دہشتگردی کی کوششوں کو مؤثر طور پر ناکام بنایا گیا ہے۔
