قومی ون ڈے کرکٹ ٹیم شاہین شاہ آفریدی نے کہا ہے کہ بابراعظم کی حالیہ اننگز نے نہ صرف ان کی بیٹنگ فارم کو بحال کیا ہے بلکہ پوری ٹیم پر مثبت اثرات ڈالے ہیں۔ شاہین کے مطابق بابراعظم ایسے کھلاڑی نہیں جنہیں 2 یا 3 میچوں کی ناکامی کی بنیاد پر پرکھا جائے، وہ گزشتہ 4 سے 5 سال سے پاکستان کے لیے مستقل پرفارم کررہے ہیں۔
یہ بھی پڑھیں: جب آپ رنز بناتے ہیں تو جیت کا یقین ہوتا ہے، بابر اعظم اور سلمان علی آغا کی دلچسپ گفتگو
اپنی پریس کانفرنس میں شاہین شاہ آفریدی نے کہا کہ پاکستان کی نمائندگی میرے لیے اعزاز ہے اور بطور سینئر کھلاڑی ذمہ داری بڑھ جاتی ہے۔ ان کا کہنا تھا کہ وہ ہمیشہ کوشش کرتے ہیں کہ میدان میں 100 فیصد کارکردگی دکھائیں۔
انہوں نے کہا کہ 17 سال بعد ملک میں انٹرنیشنل کرکٹ کی واپسی ہوئی ہے، جنوبی افریقہ کے خلاف سیریز ہمیشہ سخت ہوتی ہے، تاہم پاکستانی کھلاڑی پراعتماد ہیں اور حالیہ ٹی 20 سیریز میں ٹیم نے اچھا کھیل دکھایا ہے۔
یہ بھی پڑھیں: آئی سی سی ون ڈے رینکنگ: رضوان و شاہین کی تنزلی، بابراعظم نمبر 2 پر
شاہین شاہ آفریدی نے کہا کہ کھلاڑیوں کا کام صرف کرکٹ کھیلنا ہے، فیصلے ادارے کرتے ہیں اور ہم اس کا احترام کرتے ہیں۔ ان کا کہنا تھا کہ وہ اپنی بولنگ میں مزید بہتری لانے پر فوکس کررہے ہیں اور چاہتے ہیں کہ ٹیم کو ون ڈے اور ٹی 20 دونوں میں مضبوط کریں۔
انہوں نے یہ بھی بتایا کہ پچھلے ٹورنامنٹ میں شدید گرمی نے بولرز کو مشکل میں ڈالا، مگر اب موسم بہتر ہورہا ہے، البتہ شام کے وقت گیند گیلی ہونے سے مشکلات رہیں گی۔
یہ بھی پڑھیں: محمد رضوان کی چھٹی، فاسٹ بولر شاہین شاہ آفریدی قومی ون ڈے ٹیم کے کپتان مقرر
بابر اعظم کی واپسی پر اظہار خیال کرتے ہوئے کپتان نے کہا کہ جب سینیئر کھلاڑی پرفارم کرتے ہیں تو پورا اسکواڈ مضبوط ہوتا ہے، اور بابراعظم نے پچھلے میچ میں دکھایا کہ وہ میچ فنش کرنے کی صلاحیت رکھتے ہیں۔
انہوں نے کہا کہ وہ کپتان ہوں یا نہ ہوں، ہمیشہ پاکستان کے لیے بہترین کھیل پیش کرنے کی کوشش کریں گے۔
