اسلام آباد ہائیکورٹ نے اسد عمر کو جیل میں ملاقات اور گھر کا کھانا فراہم کرنے کی اجازت دے دی

اسلام آباد ہائیکورٹ نے اسد عمر کو جیل میں ملنے اور گھر کا کھانا فراہم کرنے کی درخواست منظور کرتے ہوئے متعلقہ اداروں کو حکم جاری کر دیا۔

اسد عمر کو اہل خانہ سے ملاقات اور گھر کا کھانا فراہم کرنے سے متعلق درخواست اسلام آباد ہائیکورٹ میں دائر کی گئی، جس پر جسٹس میاں گل حسن اورنگزیب نے درخواست قابل سماعت قرار دیتے ہوئے مذکورہ کیس کی سماعت کی۔

درخواست گزار وکیل آمنہ علی عدالت میں پیش ہوئیں اور موقف اختیار کیا کہ اسد عمر کی جیل میں طبیعت ٹھیک نہیں ہے اس لیے انکو گھر کا کھانا فراہم کرنے کی اجازت دی جائے۔

درخواست گزار نے استدعا کی کہ اسد عمر کو اہل خانہ کے ساتھ  ملنے کی بھی اجازت دی جائے۔

عدالت نے سماعت کے بعد اسد عمر کو گھر کا کھانا اور اہل خانہ سے ملنے کی اجازت دیتے ہوئے متعلقہ اداروں کو حکم جاری کر دیا۔

واضح رہے اسد عمر 9 مئی والے دن سے اب زیر حراست ہیں تاہم اچانک انکی جیل میں طبیعت خراب ہو گئی جس کی وجہ سے انکے اہل خانہ نے ہائی کورٹ میں ان سے ملنے اور کھانا فراہم کرنے کی اجازت طلب کی۔