بلوچستان کے ضلع نصیرآباد میں ہونے والے گرینڈ جرگے میں مقامی قبائل نے پاک فوج اور فرنٹیئر کور بلوچستان نارتھ کی امن کے قیام اور اس کے تحفظ کے لیے کی جانے والی کوششوں کو سراہا۔
مزید پڑھیں: بلوچستان: 2025 میں 78 ہزار آپریشنز کے دوران 700 سے زیادہ دہشتگرد ہلاک
ضلع نصیر آباد میں ایف سی نارتھ کے زیراہتمام ہونے والے گرینڈ جرگے میں گورنر بلوچستان شیخ جعفر خان مندوخیل، وزیر اعلیٰ میر سرفراز بگٹی، کور کمانڈر 12 کور لیفٹیننٹ جنرل راحت نسیم احمد خان، آئی جی ایف سی بلوچستان (نارتھ) میجر جنرل محمد عاطف مجتبٰی، آئی جی پولیس، کمشنر نصیر آباد ڈویژن اور کثیر تعداد میں قبائلی عمائدین نے شرکت کی۔
جرگے کے دوران علاقے کی سلامتی، ہم آہنگی، قبائلی روابط اور ترقیاتی منصوبوں پر تفصیلی بات چیت کی گئی۔
مقامی قبائل نے پاک فوج اور فرنٹیئر کور بلوچستان نارتھ کی امن کے قیام اور اس کے تحفظ کے لیے کی جانے والی کوششوں کو سراہا۔
گورنر بلوچستان نے عمائدین سے خطاب میں کہاکہ قبائلی عوام ہمیشہ سے ریاستی اداروں کے مضبوط شراکت دار رہے ہیں اور امن کے تسلسل، ترقیاتی منصوبوں کی کامیابی اور نوجوانوں کے روشن مستقبل کے لیے مشترکہ حکمت عملی ضروری ہے۔
وزیر اعلیٰ میر سرفراز بگٹی نے کہاکہ پاک فوج اور فرنٹیئر کور خطے میں پائیدار امن، سماجی استحکام اور بنیادی سہولیات کی بہتری کے لیے تمام وسائل استعمال کرے گی، اور علاقے میں امن قائم رکھنے میں قبائلی عمائدین کا کردار نہایت اہم ہے۔
کور کمانڈر 12 کور لیفٹیننٹ جنرل راحت نسیم احمد خان نے کہا کہ بلوچستان کی ترقی و خوشحالی کا دارومدار امن و اتحاد پر ہے، عوام کو دہشتگردوں کے عزائم کو ناکام بنانا ہوگا اور وطن دشمن عناصر کی سازشوں کو شکست دینے کے لیے سب کو مل کر کام کرنا ہوگا۔
مزید پڑھیں: اس سال بلوچستان میں اب تک 500 سے زیادہ دہشتگرد مارے جا چکے، سرفراز بگٹی
جرگے کے اختتام پر تمام قبائلی عمائدین نے حکومت بلوچستان، پاک فوج اور فرنٹیئر کور بلوچستان کی جانب سے امن قائم رکھنے، خاص طور پر کوہان سروے پراجیکٹ اور این 65 کی سیکیورٹی کے اقدامات کو خوش آئند قرار دیا اور اس بات کا عزم ظاہر کیا کہ وہ علاقائی امن، سماجی اتحاد اور ترقی کے عمل میں ریاستی اداروں کے ساتھ شانہ بشانہ کھڑے رہیں گے۔
