صدر مملکت آصف علی زرداری نے بغداد میں عراق کے صدر عبداللطیف جمال راشد سے ملاقات کی ہے۔ صدارتی محل آمد پر صدرِ پاکستان کے اعزاز میں باضابطہ استقبالیہ تقریب منعقد کی گئی اور گارڈ آف آنر پیش کیا گیا۔
یہ بھی پڑھیں: صدر آصف علی زرداری 5 روزہ دورے پر کل عراق روانہ ہوں گے
ایوان صدر کے پریس ونگ سے جاری بیان کے مطابق اتوار کے روز صدر مملکت آصف علی زرداری اور عراقی صدر کے درمیان صدارتی محل میں ون آن ون ملاقات ہوئی۔ دونوں ممالک کے وفود کی سطح پر مذاکرات میں دوطرفہ تعلقات، باہمی تعاون، علاقائی صورتحال اور اہم عالمی امور پر تبادلہ خیال کیا گیا۔
صدر مملکت نے پرتپاک استقبال اور شاندار میزبانی پر صدر عبداللطیف جمال راشد کا شکریہ ادا کرتے ہوئے کہا کہ بغداد تہذیب، تمدن اور استقامت کی علامت ایک تاریخی شہر ہے۔
یہ بھی پڑھیں: صدر آصف علی زرداری سے سعودی سفیر نواف بن سعید المالکی کی ملاقات، باہمی تعاون پر تبادلہ خیال
انہوں نے عراق میں پارلیمانی انتخابات کے کامیاب انعقاد پر عراقی قیادت اور عوام کو مبارکباد دی اور نئی حکومت کی تشکیل کے لیے نیک تمناؤں کا اظہارکیا۔ انہوں نے عراق کی خودمختاری، علاقائی سلامتی اور قومی وحدت کے لیے پاکستان کی غیرمتزلزل حمایت کا اعادہ کیا۔
