9 مئی کے پرتشدد مظاہروں کے بعد گرتاریوں سے بچنے کے لیے روپوش پاکستان تحریک انصاف کے رہنما اور سابق وفاقی وزرا سینیٹر اعظم سواتی اور مراد سعید نے پولیس کی جانب سے گرفتاری کے لیے مسلسل چھاپوں اور مقدمات کی تفصیل نہ دینے پر پشاور ہائیکورٹ سے رجوع کرلیا۔
سابق وزرا اعظم خان سواتی اور مراد سعید نے اپنے وکلا قاضی انور ایڈوکیٹ، شاہ فیصل اتمانخیل اور قیصر علی شاہ ایڈوکیٹ کی وساطت سے پشاور ہائیکورٹ میں رٹ پیٹشن دائر کی ہیں۔ جس میں استدعا کی ہے کہ انہیں گرفتار نہ کیا جا ئے، وہ دونوں عدالت کے سامنے سرنڈر کرنے کو تیار ہیں۔
رٹ میں تحریک انصاف کے رہنماؤں نے موقف اپنایا ہے کہ پولیس بغیر کوئی وجہ بتائے درخواست گزاروں کے گھروں پر چھاپے مارہی ہے۔ مزید لکھا ہے کہ درخواست گزاروں نے پولیس اور دیگر فریقین سے ان کے خلاف درج مقدمات کی تفصیل فراہم کرنے کے لیے درخواست دی لیکن ان کو ابھی تک تفصیل فراہم نہیں کی گئی۔ اور مقدمات کی تفصیل فراہم نہ کرنا غیر قانونی ہے۔
رٹ میں موقف اپنایا گیا ہے کہ درخواست گزاروں کے خلاف کتنے مقدمات درج کیے گئے ہیں اس کی تفصیل عدالت کو فراہم کی جائے، سابق وزرا نے عدالت سے درخواست کی ہے کہ پولیس کو گھروں پر چھاپے مارنے سے روکا جائے۔
رٹ میں مزید لکھا گیا ہے کہ سینیٹراعظم سواتی اور سابق وفاقی وزیر مراد سعید پرامن اور قانون کا احترام کرنے والے شہری ہیں۔ دونوں سیاسی طور پر پاکستان تحریک انصاف سے وابستہ ہیں، وفاق میں حکومت کی تبدیلی کے بعد ان کے خلاف انتقامی کارروائی کی جارہی ہے۔ ان کو ان کے قانونی حق سے محروم کیا جا رہا ہے۔ اور مقدمات کی تفصیلات فراہم نہ کرکے گرفتاری کے لیے چھاپے مارے جا رہے ہیں۔
پشاور ہائیکورٹ میں دائر درخواست میں وفاقی اور صوبائی حکومت، آئی جی پولیس خیبرپختونخوا اور سیکرٹری ہوم کو فریق بنایا گیا ہے۔
یاد رہے کہ 9مئی کے پرتشدد مظاہروں کے بعد خیبر پختونخوا میں مراد سعید سمیت اہم رہنما روپوش ہیں جن کی گرفتاری کے لیے پولیس ان کے گھروں اور دیگر ٹھکانوں پر چھاپے مار رہی ہے۔ پولیس کے مطابق ابھی تک 9مئی کے پرتشدد مظاہروں میں 7سابق اراکین اسمبلی سمیت 2500 سے زائد افراد کو گرفتار کیا گیا ہے۔
