تحریک انصاف کی سابق ایم این اے عائشہ گلالئی ق لیگ میں شامل

تحریک انصاف کی سابق ایم این اے عائشہ گلالئی نے ق لیگ میں شمولیت اخیتار کرلی ہے، لاہور میں ق لیگ کے رہنماؤں کے ہمراہ پریس کانفرنس کرتے ہوئے شمولیت کا اعلان کیا۔

لاہور میں چودھری شجاعت حسین ،چودھری سرور، چودھری شافع حسین ، مصطفیٰ ملک اور دیگر کے ہمراہ پریس کانفرنس کرتے ہوئے عائشہ گلالئی نے کہا کہ آج یوم تکریم شہداء منایا جارہا ہے، شہداء کے اہل خانہ ہماری دعاؤں میں ہمیشہ رہیں گے۔ ق لیگ میں شامل ہونے کامقصد پاکستان کی بات کرنا ہے۔

انہوں نے کہا کہ 2017میں مجھے معلوم تھا کہ ہواؤں کا رخ کس طرف ہے، اس وقت میں نے جو آواز اٹھائی تھی وہ آج سچ ثابت ہوگئی ہے۔

چوہدری شجاعت حسین نے کہا کہ ق لیگ میں شمولیت اختیار کرنے والوں کوخوش آمدید کہتا ہوں، جنہوں نے ق لیگ میں شمولیت اختیار کی انکا شکریہ ادا کرتا ہوں۔

چوہدری شجاعت حسین کا کہنا تھا کہ کسی بھی شخص میں انا آجائے تو یہ بہت خطرناک ہوتی ہے۔

 چوہدری محمد سرور نے کہا کہ 9 مئی کواستحکام پاکستان کو خطرے میں ڈالا گیا، چودھری شجاعت کی قیادت میں لوگ کثیر تعداد میں پارٹی میں شامل ہورہے ہیں۔ خیبرپختونخوا سے بھی رہنما ق لیگ میں شامل ہورہے ہیں۔