دنیا کی سب سے زیادہ معاوضہ لینے والی خاتون فٹبالر کون ہیں؟

امریکی خاتون فٹبال اسٹار ٹرینیٹی روڈمین 2026 میں دنیا کی سب سے زیادہ معاوضہ لینے والی خاتون فٹبالر بن گئیں۔

یہ بھی پڑھیں: کیا عظیم فٹبالر رونالڈو فلمی دنیا میں قدم رکھنے والے ہیں؟

بی بی سی اسپورٹس کے مطابق ٹرینیٹی نے واشنگٹن اسپرٹ کے ساتھ ایک تاریخی معاہدہ طے کر کے یہ اعزاز حاصل کیا۔

این بی اے کے سابق اسٹار ڈینس روڈمین کی صاحبزادی ٹرینیٹی روڈمین نے واشنگٹن اسپرٹ کے ساتھ 3 سالہ معاہدہ کیا ہے جس کے تحت انہیں بونس سمیت سالانہ تقریباً 20 لاکھ ڈالر (15 لاکھ پاؤنڈ) ادا کیے جائیں گے۔

یہ معاہدہ 22 جنوری کو ایک خصوصی پریس کانفرنس میں کیا گیا جو انہیں 2028 تک کلب سے وابستہ رکھے گا۔

مزید پڑھیے: ریٹائرمنٹ کے بعد لیونل میسی کیا کرنا پسند کریں گے؟ فٹبالر نے خود بتادیا

23 سالہ ٹرینیٹی روڈمین اس سے قبل فری ایجنٹ تھیں کیونکہ واشنگٹن اسپرٹ کے ساتھ ان کا پچھلا معاہدہ 31 دسمبر کو ختم ہو گیا تھا۔

نیا قانون، نیا ریکارڈ

سنہ2025 تک نیشنل ویمنز ساکر لیگ میں ہر ٹیم کے لیے مجموعی تنخواہوں کی حد 35 لاکھ ڈالر مقرر تھی۔ تاہم دسمبر میں منظور ہونے والے نئے قانون ’ہائی امپیکٹ پلیئر‘ کے تحت کلبوں کو مخصوص معیار پر پورا اترنے والے اسٹار کھلاڑیوں پر اضافی 10 لاکھ ڈالر خرچ کرنے کی اجازت دی گئی جس سے یہ ریکارڈ معاہدہ ممکن ہوا۔

معاہدے پر دستخط کے بعد ٹرینیٹی روڈمین نے خوشی کا اظہار کرتے ہوئے کہا کہ یہ ناقابل یقین محسوس ہو رہا ہے اور میں بہت خوش اور شکر گزار ہوں۔

انہوں نے مزید کہا کہ یہ ایک تاریخی گیم چینجنگ لمحہ ہے جسے الفاظ میں بیان کرنا مشکل ہے۔

واشنگٹن اسپرٹ کی مالک مشیل کانگ نے بھی کھلاڑی کی تعریف کرتے ہوئے کہا کہ ٹرینیٹی ایک نسل کی نمائندہ کھلاڑی ہیں اور سب سے بڑھ کر وہ اس کلب اور خواتین فٹبال کے مستقبل کی علامت ہیں۔

اس تاریخی معاہدے سے قبل اسپین کے کلب بارسلونا کی مڈفیلڈر آئیتانا بونماتی دنیا کی سب سے زیادہ کمائی کرنے والی خاتون فٹبالر تھیں۔

ٹرینیٹی روڈمین کون ہیں؟

ٹرینیٹی روڈمین کی پیدائش کیلیفورنیا میں ہوئیں۔ وہ سابق پروفیشنل باسکٹ بال کھلاڑی ڈینس روڈمین اور مشیل موئر کی بیٹی ہیں۔

انہوں نے سنہ 2021 میں محض 19 سال کی عمر میں ہائی اسکول سے سیدھا واشنگٹن اسپرٹ جوائن کیا۔ اس کے بعد سے وہ ٹیم کی کامیابی میں اہم کردار ادا کرتی آ رہی ہیں۔