بگ باس 13 کی سابقہ امیدوار اور ٹیلی وژن اداکارہ شیفالی بگّا نے بھارتی کرکٹر یوزویندر چہل کی ذاتی زندگی سے منسوب ایک اے آئی سے تیار کردہ تصویر کے وائرل ہونے پر سخت ردِعمل کا اظہار کیا ہے۔
سوشل میڈیا پر گردش کرنے والی اس تصویر میں شیفالی بگّا کو یوزویندر چاہل ان کی سابقہ اہلیہ دھنا شری ورما اور ریڈیو جاکی مہوش کے ساتھ دکھایا گیا جس کے بعد ڈیٹنگ سے متعلق قیاس آرائیوں نے زور پکڑ لیا۔
یہ بھی پڑھیں: دھنا شری ورما سے علیحدگی کے بعد یوزویندر چاہل کو ایک اور جھٹکا
یہ تصویر فلم کس کس کو پیار کروں کے پوسٹر سے متاثر ہو کر تیار کی گئی تھی اور دیکھتے ہی دیکھتے مختلف سوشل میڈیا پلیٹ فارمز پر وائرل ہو گئی۔ تصویر وائرل ہونے کے بعد شیفالی بگّا نے انسٹاگرام اسٹوری کے ذریعے اس پر سخت برہمی کا اظہار کرتے ہوئے اسے غیر اخلاقی، نقصان دہ اور خواتین کے خلاف آن لائن رویّوں کی عکاسی قرار دیا۔
اداکار ہ نے لکھا کہ یہ انتہائی گھٹیا ہے۔ جس انداز میں ٹرولز لڑکیوں کے ساتھ سلوک کرتے ہیں وہ شرمناک ہے۔ یہ ہماری سوچ کی واضح عکاسی ہے۔ اس معاملے پر یوزویندر چہل نے بھی طنزیہ انداز میں ردعمل دیا۔ انہوں نے وائرل پوسٹر پر تبصرہ کرتے ہوئے کہا کہ ’ابھی 2-3 رہ گئی ہیں، ایڈمن اگلی بار بہتر ریسرچ کرنا‘۔
یہ تنازع اس وقت مزید شدت اختیار کر گیا جب حال ہی میں چاہل اور شیفالی بگّا کو ممبئی کے ایک ریسٹورنٹ سے ایک ساتھ نکلتے ہوئے دیکھا گیا۔ اس موقع کی ویڈیوز اور تصاویر سوشل میڈیا پر تیزی سے وائرل ہوئیں تاہم دونوں شخصیات کی جانب سے اس ملاقات کے حوالے سے کوئی باضابطہ بیان سامنے نہیں آیا۔
یہ بھی پڑھیں: ’خودکشی کے خیالات آتے تھے‘، یوزویندر چاہل نے طلاق پر خاموشی توڑ دی
واضح رہے کہ دھنا شری ورما سے طلاق کے بعد یوزویندر چاہل کا نام ریڈیو پریزینٹر آر جے مہوش کے ساتھ جوڑا جاتا رہا ہے۔ حال ہی میں سوشل میڈیا صارفین نے یہ بھی نوٹ کیا کہ چاہل اور مہوش ایک دوسرے کو انسٹاگرام پر فالو نہیں کر رہے۔
آر جے مہوش نے اس حوالے سے کوئی براہِ راست بیان نہیں دیا تاہم انہوں نے حال ہی میں انسٹاگرام پر ایک اسٹوری شیئر کی جس میں لکھا تھا کہ 90 فیصد وقت میں اپنے بال سنوارتی نظر آؤں گی، اور باقی وقت اپنی زندگی۔
