گورنر اسٹیٹ بینک جمیل احمد کا کہنا ہے کہ 2027 تک ملکی معیشت کو سود سے پاک کرنا چاہتے ہیں، ملکی معیشت کے لیے اسلامک کیپیٹل مارکیٹ سے گروتھ میں بہتری آ رہی ہے، گزشتہ 10برسوں میں پاکستان میں اسلامک بینکنگ میں 24 فیصد اضافہ ہوا ہے، اسلامک کیپیٹل مارکیٹ کا حجم 3 ٹریلین ڈالر تک پہنچ چکا ہے۔
گورنر اسٹیٹ بینک جمیل احمد نے اسلامک کیپیٹل مارکیٹ کانفرنس سے خطاب کرتے ہوئے کہا کہ پاکستان نے 2.8 ٹریلین روپے کے اسلامک سکوک بانڈز کا اجرا کر رکھا ہے، حکومتی قرض کو اسلامک سکوک میں تبدیل کرنے کے لیے اسٹیٹ بینک میں کمیٹی قائم کی ہے۔
’اسٹیٹ بینک اور ایس ای سی پی مل کر اسلامک فنانس سیکٹر کے فروغ کے لیے اصلاحات کر رہے ہیں۔‘
ملکی معیشت مستحکم کرنے کے لیے کوشاں ہیں
دوسری جانب اسلامک کیپیٹل مارکیٹ کانفرنس سے خطاب کرتے ہوئے وزیر خزانہ اسحاق ڈار نے کہا کہ ملکی معیشت مستحکم کرنے کے لیے کوشاں ہیں، اسلامک بینکنگ کا نظام بہتر بنا رہے ہیں جو مستقبل میں ملکی معیشت کو فروغ دینے میں مدد فراہم کرے گی، ان کا کہنا ہے کہ اسلامک فنانسنگ سے غربت پر قابو پانے میں بھی مدد ملے گی۔
انہوں نے کہا کہ اسٹیٹ بینک پاکستان میں اسلامک فنانسنگ کے فروغ کے لیے بھرپورکوشش کر رہا ہے اور گورنر اسٹیٹ بینک نے اسلامک فنانسنگ کے فروغ کے لیے بڑی محنت کی ہے۔ دنیا میں اسلامک فنانسنگ تیزی سے بڑھ رہی ہے۔
مزید پڑھیں
اسحاق ڈارنے کہا کہ اسلامک بینکاری کے لیے مؤثر اقدامات کر رہے ہیں، یہ کانفرنس اسلامک فنانسنگ میں ہمارے مستقبل کے لیے مشعل راہ ہے، تمام اسلامی ممالک کے اشتراک سے معاشی چیلنجز سے نکل سکتے ہیں۔
’عالمی سطح پر اسلامک فنانس 4 ہزار ارب ڈالر سے زیادہ ہے، 2026ء میں اسلامک فنانس عالمی معیشت میں 59 ہزار ارب ڈالرز کو پہنچ جائے گا۔‘
ان کا مزید کہنا تھا کہ پاکستان میں 6 اسلامی بینک جبکہ 16 اسلامی برانچوں والے بینک کام کر رہے ہیں، پاکستان میں 2022 میں اسلامی بینکوں کی شرح نمو 29 فیصد رہی، پاکستان میں اسلامی بینکوں کے اثاثہ جات 7.2 کھرب روپے کے ہیں جبکہ اسلامی بینکوں میں ڈیپازٹ 5.2 کھرب روپے ہیں۔
