سندھ ہائی کورٹ نے تھری ایم پی او کے تحت گرفتار تحریک انصاف کے کارکنان کو بڑا ریلیف دے دیا۔
تفصیلات کے مطابق سندھ ہائیکورٹ میں تھری ایم پی او کے تحت گرفتار پی ٹی آئی کارکنان کی رہائی کے لیے دائر درخواست پر سماعت ہوئی۔
ایڈیشنل ایڈوکیٹ جنرل جواد ڈیرو نے موقف اختیار کیا کہ درخواستیں قابل سماعت نہیں ہیں ۔ چیف جسٹس نے کہا کہ آپ قابل سماعت کی بات بعد میں کریں مگر پہلے یہ بتائیں گرفتار شدگان کے خلاف کیا مواد ہے؟
سرکاری وکلا گرفتار شدہ پی ٹی آئی کارکنوں کے خلاف ٹھوس مواد پیش کرنے میں ناکام رہے جس پر عدالت نے تھری ایم پی او کے تحت گرفتار 40 سے زائد پی ٹی آئی کارکنان کو رہا کرنے کا حکم دے دیا۔ عدالت نے ملزمان کو10،10 ہزار روپے کے مچلکے جمع کرانے کا حکم دیا ہے۔
سرکاری وکیل نے چیف جسٹس سے استدعا کی کہ ’آپ ہمیں سن تو لیں ‘، جس پر چیف جسٹس نے کہا کہ آپ ہمارا حکم چیلنج کردیجیے گا۔
