یونائیٹڈ اسٹیٹس ایجوکیشنل فاؤنڈیشن ان پاکستان (یو ایس ای ایف پی) کے تحت اسلام آباد میں، امریکا میں تعلیم کے حوالے سے ایجوکیشن فیئر کا انعقاد کیا جس میں 16 امریکی یونیورسٹیوں نے اپنے اسٹالز لگائے اور طلبہ کو رہنمائی فراہم کی۔
ایونٹ کے لئے ملک بھر سے دو ہزار طلبہ نے رجسٹر کیا تھا، اور پاک بھارت میچ کے باوجود طلبہ نے بھرپور شرکت کی۔ جڑواں شہروں کے علاوہ دور دراز سے آئے طلبہ نے اسٹالز پر موجود یونیورسٹی نمائندوں سے امریکا میں تعلیم کے حوالے سے معلومات حاصل کی۔
یو ایس ای ایف پی کی سینیئر ایجوکیشن آفیسر شزا طارق نے وی نیوز سے خصوصی گفتگو کرتے ہوئے بتایا کہ طلبہ کی دلچسپی بہت حوصلہ افزا ہے اور یہاں پر طلبہ کو امریکا میں تعلیمی کیریئر کے بارے میں مکمل معلومات فراہم کی جا رہی ہیں کہ پاکستانی طلبہ کیسے داخلے سے لے کر امریکا روانگی تک کے تمام مراحل پورے کر سکتے ہیں۔
طلبہ نے تعلیمی میلے کے انعقاد پر خوشی کا اظہار کیا اور کہا کہ درکار معلومات فیس اسٹرکچر اور کورسز کے بارے میں اچھے سے رہنمائی کی جا رہی ہے۔ امریکی یونیورسٹیاں دنیا بھر میں سب سے زیادہ معیاری سمجھی جاتی ہیں۔ طلبہ نے کہا کہ وہ بین الاقوامی یونیورسٹیوں سے تعلیم کے لیے پرجوش ہیں۔
