پاکستان کی صفِ اول کی ٹیلی کام اور آئی سی ٹی کمپنی پاکستان ٹیلی کمیونی کیشن کمپنی لمیٹڈ (پی ٹی سی ایل) نے 31 دسمبر 2025 کو ختم ہونے والے مالی سال کے سالانہ نتائج جاری کردیے، جن کے مطابق کمپنی نے مضبوط مالی اور آپریشنل کارکردگی کا مظاہرہ کرتے ہوئے اپنی مجموعی آمدن کو 120 ارب روپے سے زائد تک پہنچا دیا۔
یہ بھی پڑھیں: پی ٹی سی ایل فلیش فائبر کی عالمی کامیابی، اوکلا کے دو بڑے اعزازات حاصل
کمپنی نے فکسڈ براڈبینڈ، انٹرپرائز، ہول سیل اور موبائل خدمات میں مسلسل ترقی کے باعث مربوط ٹیلی کام اور ڈیجیٹل خدمات فراہم کرنے والی نمایاں کمپنی کے طور پر اپنی پوزیشن مزید مستحکم کی۔
منافع میں نمایاں اضافہ
پی ٹی سی ایل کی مجموعی آمدن میں سال بہ سال 12 فیصد اضافہ ریکارڈ کیا گیا، جس کی بنیادی وجہ فلیش فائبر میں 50 فیصد اور بزنس سلوشنز میں 16 فیصد نمو رہی۔ اسی طرح کیریئر اور ہول سیل کاروبار میں 28 فیصد اضافہ ہوا، جبکہ بین الاقوامی شعبے کی آمدن میں بھی 3 فیصد اضافہ دیکھنے میں آیا۔
کمپنی کا آپریٹنگ منافع 49 فیصد اضافے کے ساتھ 18.2 ارب روپے تک پہنچ گیا۔ سپریم کورٹ کے فیصلے کے تحت 6.9 ارب روپے کی اضافی پنشن ذمہ داری کے باوجود کمپنی نے 1.4 ارب روپے کا خالص منافع حاصل کیا۔
یہ بھی پڑھیں: انڈس اے آئی ویک 2026: پی ٹی سی ایل جدید ترین اے آئی سہولیات کی نمائش کرے گی
تاہم احتیاطی مالیاتی ضوابط میں تبدیلی کے باعث یو بینک سے متعلق متوقع کریڈٹ نقصان کی پیش بندی کے نتیجے میں مجموعی طور پر 9.7 ارب روپے کا خالص نقصان بھی ریکارڈ کیا گیا۔
یوفون کی کارکردگی میں نمایاں بہتری
پی ٹی سی ایل کی ذیلی کمپنی یوفون کی آمدن میں سالانہ بنیادوں پر 14 فیصد اضافہ ہوا، جس کی بڑی وجہ ریٹیل اور کارپوریٹ شعبوں میں ترقی رہی۔
یوفون کا آپریٹنگ منافع 283 فیصد اضافے کے ساتھ 17.6 ارب روپے تک پہنچ گیا، جبکہ کمپنی کے مجموعی نقصان میں 89 فیصد کی نمایاں کمی ریکارڈ کی گئی۔
ٹیلی نار پاکستان کے حصول کا اہم سنگ میل
سال 2025 کے دوران پی ٹی سی ایل نے تمام ضروری ریگولیٹری منظوریوں کے بعد ٹیلی نار پاکستان کے حصول کا عمل مکمل کیا۔ یہ معاہدہ 31 دسمبر 2025 کو باضابطہ طور پر مکمل ہوا، جبکہ یکم جنوری 2026 سے اس کے مالی نتائج پی ٹی سی ایل گروپ میں شامل کیے جائیں گے۔
یہ بھی پڑھیں: نئے آسمانوں میں نئی اُڑان: پی ٹی سی ایل نے باضابطہ ٹیلی نار پاکستان کا انتظام سنبھال لیا
ٹیلی نار پاکستان اور اورین ٹاورز اب پی ٹی سی ایل کی ذیلی کمپنیوں کے طور پر کام کر رہے ہیں، جبکہ مستقبل میں یوفون اور ٹیلی نار کے مجوزہ انضمام کے ذریعے نیٹ ورک کوریج اور ڈیجیٹل خدمات کو مزید مضبوط بنانے کا منصوبہ ہے۔
فلیش فائبر اور ڈیجیٹل خدمات میں تیز رفتار ترقی
پی ٹی سی ایل فلیش فائبر نے 50 فیصد نمو اور صارفین کی تعداد میں 33 فیصد اضافے کے ساتھ فائبر براڈبینڈ مارکیٹ میں اپنی قیادت برقرار رکھی۔ کمپنی کی تیز رفتار انٹرنیٹ آفرز نے صارفین کو بہتر اور سستی خدمات فراہم کرنے میں اہم کردار ادا کیا۔
ڈیجیٹل خدمات میں بھی نمایاں پیش رفت ہوئی، جہاں یوپیسہ کے ماہانہ فعال صارفین کی تعداد 15 لاکھ سے تجاوز کر گئی، جبکہ لین دین میں 57 فیصد اضافہ ہوا اور ماہانہ حجم 21.9 ارب روپے تک پہنچ گیا۔
اسی طرح یو ٹی سی ایل ایپ کے ماہانہ صارفین کی تعداد 57 لاکھ سے بڑھ گئی، جبکہ یوفون کے ڈیجیٹل برانڈ اونک کے صارفین 4 لاکھ 6 ہزار تک پہنچ گئے اور اس میں 169 فیصد سالانہ اضافہ ریکارڈ کیا گیا۔
انٹرپرائز، کلاؤڈ اور جدید ٹیکنالوجی میں پیش رفت
پی ٹی سی ایل نے بینکنگ، تعلیم، صحت، ہوا بازی اور حکومتی اداروں کو آئی سی ٹی اور کلاؤڈ خدمات فراہم کرتے ہوئے نمایاں ترقی حاصل کی۔ پی ٹی سی ایل اسمارٹ کلاؤڈ نے خودکار کلاؤڈ، سکیورٹی اور ڈیٹا ریکوری خدمات کے ذریعے مضبوط کارکردگی دکھائی۔
یہ بھی پڑھیں: پی ٹی سی ایل گروپ اور مرکنٹائل نے پاکستان میں آئی فون 17 کی لانچ کا اعلان کردیا
کمپنی نے مصنوعی ذہانت کے لیے تیار جدید ڈیٹا سینٹر انفراسٹرکچر کو بھی مزید بہتر بنایا، جبکہ عالمی سطح پر سب میرین کیبل نیٹ ورک اور فائبر انفراسٹرکچر کے ذریعے اپنی پوزیشن مستحکم کی۔
جدید ڈیجیٹل سہولیات اور صارفین کے لیے نئی پیشکشیں
پی ٹی سی ایل نے واٹس ایپ کے ذریعے بل ادائیگی اور پی ڈی ایف بلنگ جیسی نئی سہولیات متعارف کروائیں، جس سے صارفین کے لیے خدمات مزید آسان ہو گئیں۔
کمپنی نے ایپل کے مجاز ڈسٹری بیوٹر مرکینٹائل کے ساتھ شراکت داری کے تحت آئی فون 17 سیریز کو خصوصی آفرز کے ساتھ پاکستان میں متعارف کروایا۔
سماجی خدمات اور ڈیجیٹل شمولیت کے اقدامات
پی ٹی سی ایل نے دل سے پلیٹ فارم کے تحت سماجی ترقی، ڈیجیٹل شمولیت اور تعلیم کے مختلف منصوبے جاری رکھے۔ بااختیار پروگرام کے تحت 79 خواتین نے ڈیجیٹل تربیت حاصل کر کے اپنا کاروبار شروع کیا۔
یہ بھی پڑھیں: انٹرنیٹ کی سست رفتاری کا مسئلہ حل کرلیا گیا، پی ٹی سی ایل کا دعویٰ
کمپنی نے سیلاب سے متاثرہ علاقوں میں مفت کنیکٹیویٹی فراہم کی، جبکہ تھر اور عمرکوٹ سمیت دور دراز علاقوں میں صاف پانی کی فراہمی کے منصوبے بھی مکمل کیے، جس سے 2 لاکھ سے زائد افراد مستفید ہوں گے۔
مستقبل کے اہداف
پی ٹی سی ایل کی جانب سے جاری بیان کے مطابق کمپنی مستقبل میں ڈیجیٹل انفراسٹرکچر، فائبر نیٹ ورک، کلاؤڈ سروسز اور جدید ٹیکنالوجی میں مزید سرمایہ کاری جاری رکھے گی، تاکہ پاکستان میں ڈیجیٹل معیشت کو فروغ دیا جا سکے اور صارفین کو عالمی معیار کی خدمات فراہم کی جا سکیں۔
یہ نتائج کمپنی کی مضبوط کاروباری حکمت عملی اور پاکستان میں ٹیلی کام اور ڈیجیٹل شعبے میں اس کے قائدانہ کردار کی عکاسی کرتے ہیں۔
