سعودی عرب کی نیشنل واٹر کمپنی نے ماہِ رمضان کے دوران عمرہ زائرین کی بڑھتی ہوئی ضروریات کو مدنظر رکھتے ہوئے 22 لاکھ سے زائد زمزم کے پانی کی بوتلوں کا اسٹریٹجک ذخیرہ تیار کرلیا ہے، جبکہ یومیہ پیداوار کی صلاحیت 2 لاکھ 5 لیٹر بوتلوں تک پہنچا دی گئی ہے۔
یہ بھی پڑھیں:حاجیوں کو آب زم زم کی اضافی قیمت دینا ہوگی یا نہیں؟
سعودی خبر رساں ایجنسی کے مطابق نیشنل واٹر کمپنی، جو کنگ عبداللہ بن عبدالعزیز زمزم واٹر پروجیکٹ کی سرکاری نگران اور آپریٹر ہے، نے اعلان کیا ہے کہ رمضان المبارک کے لیے تمام انتظامات مکمل کرلیے گئے ہیں۔ اس سلسلے میں 22 لاکھ سے زائد زمزم کی بوتلوں کا ذخیرہ رکھا گیا ہے تاکہ مسجد الحرام اور دیگر مقامات پر آنے والے زائرین کی ضروریات پوری کی جا سکیں۔
کمپنی کے مطابق منصوبے کی یومیہ پیداواری صلاحیت 2 لاکھ 5 لیٹر بوتلوں تک پہنچ چکی ہے، تاکہ ہر سال رمضان میں بڑھتی ہوئی طلب کو پورا کیا جا سکے۔ زمزم کی تقسیم مرکزی ہیڈکوارٹر کے علاوہ مملکت بھر میں قائم 750 سے زائد سیلز آؤٹ لیٹس کے ذریعے جاری رہے گی، جبکہ 330 ملی لیٹر کی چھوٹی بوتلیں “نسک” ایپلی کیشن کے ذریعے بھی حاصل کی جا سکتی ہیں۔
یہ بھی پڑھیں:آب زم زم لانے پر مکمل پابندی عائد
کمپنی نے بتایا کہ مسجد الحرام میں 24 گھنٹے زمزم کی فراہمی جاری ہے، جبکہ مسجد نبویؐ کو بھی متعلقہ اداروں کے تعاون سے روزانہ 5 کروڑ لیٹر سے زائد زمزم پانی محفوظ اور صحت بخش طریقے سے فراہم کیا جا رہا ہے۔
حکام کے مطابق زمزم واٹر پروجیکٹ میں پیداوار کا عمل جدید ترین ٹیکنالوجی کے تحت مکمل طور پر خودکار نظام کے ذریعے کنویں سے لے کر بوتل بندی تک انجام دیا جاتا ہے، جس میں انسانی مداخلت شامل نہیں ہوتی۔ مزید برآں، جدید لیبارٹریوں میں روزانہ 400 سے زائد ٹیسٹ کیے جاتے ہیں تاکہ پانی کے اعلیٰ معیار اور حفاظت کو یقینی بنایا جا سکے۔
