پاکستان تحریک انصاف (پی ٹی آئی) نے فواد چوہدری اور دیگر رہنماؤں کی پی ٹی آئی لیڈرشپ سے ملاقات کی خبروں کا حوالہ دیتے ہوئے کہا ہے مذاکرات کی افواہیں کچھ ایسے لوگوں کی جانب سے پھیلائی جا رہی ہیں جو پہلے ہی پارٹی چھوڑ چکے ہیں۔
واضح رہے کہ بدھ کو پی ٹی آئی کے منحرف رہنما چوہدری فواد نے میڈیا کو بتایا تھا کہ ان کی دیگر ساتھیوں کے ہمراہ پی ٹی آئی کی لیڈرشپ بشمول شاہ محمود قریشی سے اڈیالہ جیل میں ملاقات ہوئی اور پی ٹی ایم حکومت کے خلاف مل کر کام کرنے پر اتفاق ہوا۔ فواد چوہدری کی اس گفتگو سے تاثر ملا کہ وہ اور ان کے ساتھیوں کا پی ٹی آئی کے کچھ رہنماؤں کے ساتھ کوئی اتحاد بننے جا رہا ہے۔
پی ٹی آئی کے مرکزی سیکریٹری اطلاعات رؤف حسین نے اپنے بیان میں کہا ہے کہ چیئرمین پی ٹی آئی عمران خان کی اجازت سے مذاکرات کے لیے ایک کمیٹی پہلے ہی تشکیل دے دی گئی ہے جو عمران خان کی اجازت سے ہی کام کرے گی۔
رؤف حسین کا کہنا تھا کہ ’یہ اقتدار میں بیٹھے لوگوں سے بات کرنے کے لیے کیا گیا جنہوں نے ملک کو تباہی کے دہانے پر دھکیل دیا ہے تاہم جو لوگ پہلے ہی پی ٹی آئی چھوڑ چکے ہیں اور اب اس کا حصہ نہیں ہیں ان سے مذاکرات کی ضرورت سمجھ سے بالاتر ہے۔
پارٹی کے مرکزی سیکریٹری اطلاعات نے کہا کہ اس طرح کی افواہوں سے ان لوگوں کی ساکھ میں کوئی بہتری نہیں آئے گی جنہوں نے ایک ذلت آمیز کردار کا مظاہرہ کیا۔
فواد چوہدری، شاہ محمود ملاقات سے میڈیا غلط تاثر لے رہا ہے، زین قریشی
پاکستان تحریک انصاف (پی ٹی آئی) کے رہنما مخدوم زین حسین قریشی نے پارٹی کے کچھ سابق رہنماؤں کی اڈیالہ جیل میں پی ٹی آئی کے وائس چیئرمین شاہ محمود قریشی سے ملاقات پر میڈیا میں پیدا ہونے والے تاثر کی تردید کی ہے۔
آج اڈیالہ جیل میں تحریک انصاف کے سابق رہنماؤں سے @SMQureshiPTI صاحب کی ملاقات پر میڈیا میں جو تاثر دیا جا رہا ہے میں اُسکی تردید کرتا ہوں۔
مخدوم صاحب پارٹی کے وائس چیئرمین ہیں اور@PTIofficial ایک نظریے کا نام ہے، ہم تحریک انصاف اور @ImranKhanPTI کے نظریے کے ساتھ کھڑے ہیں!
شاہ… pic.twitter.com/P7d0OzrxCO— Zain Hussain Qureshi (@ZainHQ) May 31, 2023
اسی حوالے سے زین حیسن قریشی نے ایک ٹوئٹ کیا جس میں انہوں نے واضح کیا کہ آج اڈیالہ جیل میں تحریک انصاف کے سابق رہنماؤں سے شاہ محمود قریشی صاحب کی ملاقات پر میڈیا میں جو تاثر دیا جا رہا ہے وہ اس کی تردید کرتے ہیں۔
زین قریشی کا کہنا تھا کہ شاہ محمود قریشی پارٹی کے وائس چیئرمین اور ایک نظریے کا نام ہیں اور ہم پاکستان تحریک انصاف اور عمران خان کے نظریے کے ساتھ کھڑے ہیں۔ ان کا مزید کہنا تھا کہ شاہ محمود قریشی نے آج تک صرف اصولوں اور خدمت کی سیاست کی ہے اور عہدے کی پیشکش یا کسی اور لالچ کے ذریعے انہیں خریدا نہیں جاسکتا۔ انہوں نے ایک بار پھر واضح کیا کہ شاہ محمود قریشی کل بھی عمران خان کے ساتھ تھے اور آج بھی ان ہی کے ساتھ ہیں۔
حماد اظہر کی بھی وضاحت
میں چیرمین عمران خان کا کارکن ہوں اور تحریک انصاف کا عہدہ دار۔ اگر کوئی دوست مشورہ یا حل تجویز کرنا چاہیں تو اس کا حتمی فیصلہ صرف عمران خان ہی کریں گے۔
— Hammad Azhar (@Hammad_Azhar) May 31, 2023
دریں اثنا پی ٹی آئی کے ایک اور رہنما حماد اظہر کا کہنا ہے کہ ’میں چیرمین عمران خان کا کا رکن اور تحریک انصاف کا عہدہ دار ہوں اور اگر کوئی دوست مشورہ یا حل تجویز کرنا چاہیں تو اس کا حتمی فیصلہ صرف عمران خان ہی کریں گے۔
