ایران کے قومی سلامتی کونسل کے سکریٹری علی لاریجانی نے اسرائیل پر الزام لگایا ہے کہ وہ امریکا کے ساتھ مشترکہ حملے کے بعد ایران کو ‘ٹکڑے کرنے’ کی کوشش کر رہا ہے۔
فارسی خبر رساں ایجنسی فارس کے مطابق لاریجانی نے کہا کہ ‘اسرائیل کے پاس اپنی بقا یقینی بنانے کے لیے بڑے ممالک کو تقسیم کرنے کے سوا کوئی چارہ نہیں ہے’۔ انہوں نے امریکی صدر ڈونلڈ ٹرمپ کو ‘لوٹ مار کی بہترین مثال’ قرار دیتے ہوئے ایران کے وسائل پر قبضے کی کوشش کا الزام بھی لگایا۔
یہ بھی پڑھیے: آیت اللہ علی خامنہ ای کے بعد ایران کا نیا سپریم لیڈر کون اور کیسے بنے گا؟
لاریجانی نے کہا کہ امریکا اور صہیونی حکومت نے ایرانی قوم کے دل جلا دیے، اور ہم بھی ان کے دل جلا دیں گے۔
اسرائیل پورے زور کے ساتھ کارروائی جاری رکھے گا: اسرائیلی وزیر دفاع
دوسری جانب اسرائیل کے وزیر دفاع اسرائیل کاٹز نے نیتن یاہو اور اسرائیلی فوج کو اس حملے پر مبارکباد دی جس میں ایران کے سپریم لیڈر کا قتل ہوا۔
کاٹز نے ایکس پر لکھا کہ جو اسرائیل کو تباہ کرنے کے لیے کام کرتا تھا، اسے تباہ کر دیا گیا۔ انصاف ہو چکا ہے اور شر کی محوری طاقت کو مہلک ضرب لگی ہے، اسرائیل پورے زور کے ساتھ کارروائی جاری رکھے گا۔
